હુથીઓએ લોકલ મિસાઈલથી અબજોનું F-15 ફાઇટર જેટ તોડી પાડ્યું! કાટમાળનો વીડિયો પણ કર્યો જાહેર, સાઉદીનું મૌન

Houthi down Saudi F-15 Marib : યમનના મારબ પ્રાંતમાં હુથી વિદ્રોહીઓએ સાઉદી અરેબિયાનું એક F-15 ફાઈટર જેટ તોડી પાડ્યાનો મોટો દાવો કર્યો છે. હુથીઓના જણાવ્યા અનુસાર, આ યુદ્ધવિમાન મારબના આકાશમાં શત્રુતાપૂર્ણ કાર્યવાહી કરી રહ્યું હતું ત્યારે તેને સ્થાનિક સ્તરે નિર્મિત મિસાઈલ દ્વારા નિશાન બનાવવામાં આવ્યું હતું. આ ઘટના એવા સમયે બની છે જ્યારે સાઉદી અરેબિયા દ્વારા યમનમાં હવાઈ હુમલાઓનું પ્રમાણ નોંધપાત્ર રીતે વધારી દેવામાં આવ્યું છે. યમનની સશસ્ત્ર સેનાએ આ અંગે સત્તાવાર નિવેદન જાહેર કરીને આ દાવો કર્યો હતો.

વિડિયો ફૂટેજ અને ડ્રોન તોડી પાડવાની ઘટના

હુથી સમર્થિત મીડિયા દ્વારા આ ઘટનાના ફૂટેજ પણ જાહેર કરવામાં આવ્યા છે, જેમાં વિમાનના કાટમાળ અને રણપ્રદેશમાં પડેલા ભગ્નાવશેષો જોઈ શકાય છે. વીડિયોમાં વિમાનની પૂંછડી પર સાઉદી ધ્વજ અને અરબી લખાણ પણ નજરે પડે છે. આટલું જ નહીં, હુથીઓએ દાવો કર્યો છે કે સાઉદી વિમાનોના કાટમાળની શોધખોળ દરમિયાન તેમણે એક સાઉદી 'વિંગ લૂંગ 2' સશસ્ત્ર તોહી સૈન્ય ડ્રોનને પણ આકાશમાં તોડી પાડ્યું હતું. આ હુમલાઓથી હુથીઓની વાયુ સંરક્ષણ ક્ષમતામાં વધારો થયાનું પ્રતીત થાય છે.

પર્શિયન ગલ્ફ અને વૈશ્વિક ઊર્જા બજાર પર અસર

આ તણાવપૂર્ણ સ્થિતિની સીધી અસર વૈશ્વિક ઊર્જા બજાર અને દરિયાઈ માર્ગો પર પડી રહી છે. યુએસ-ઇઝરાયલ અને ઈરાન વચ્ચેના સંઘર્ષ બાદ પર્શિયન ગલ્ફ તથા સ્ટ્રેટ ઓફ હોરમુઝમાં શિપિંગ પ્રવૃત્તિઓ પહેલેથી જ પ્રભાવિત થઈ છે. સાઉદી અરેબિયાની ઈસ્ટ-વેસ્ટ પાઈપલાઈન પર થયેલા હુમલાઓ અને તાજેતરના હવાઈ સંઘર્ષોને કારણે વૈશ્વિક સ્તરે તેલ પુરવઠા સામે ગંભીર જોખમ ઊભું થયું છે. નિષ્ણાતોના મતે, આ સંઘર્ષ મધ્ય પૂર્વની સુરક્ષા માટે અત્યંત મહત્ત્વપૂર્ણ મોડ પર આવી ગયો છે, જેનાથી વૈશ્વિક અર્થવ્યવસ્થા પર દબાણ વધી રહ્યું છે.