'...તો 155% ટેરિફ લગાવી દઈશું', ચીનને ડોનાલ્ડ ટ્રમ્પની ધમકી, ટ્રેડ વોર ગંભીર થવાનું જોખમ

Donald Trump Warning China: અમેરિકન પ્રમુખ ડોનાલ્ડ ટ્રમ્પે સોમવારે ધમકી આપી કે જો ચીનના રાષ્ટ્રપતિ શી જિનપિંગ વૉશિંગ્ટન સાથે 'નિષ્પક્ષ સમજૂતી' પર હસ્તાક્ષર નહીં કરે, તો તેઓ ચીની વસ્તુઓ પર 155% સુધીનો ટેરિફ લગાવી દેશે. ટ્રમ્પના આ નિવેદન બાદ દુનિયાની બે સૌથી મોટી અર્થવ્યવસ્થાઓ વચ્ચે વેપારને લઈને તણાવ ફરી વધી ગયો છે.

ચીનને ડોનાલ્ડ ટ્રમ્પની ધમકી

આ ચેતવણી એવા સમયે આવી છે જ્યારે ટ્રમ્પે વ્હાઇટ હાઉસમાં ઓસ્ટ્રેલિયાના વડાપ્રધાન એન્થની અલ્બેનીઝ સાથે એક મહત્ત્વપૂર્ણ ખનિજ કરાર પર હસ્તાક્ષર કર્યા છે. આ કરાર સપ્લાય ચેઇનને મજબૂત કરવા અને ચીન પરની નિર્ભરતા ઘટાડવાના પ્રયાસોનો એક ભાગ છે.

ટ્રમ્પે અલ્બેનીઝ સાથેની દ્વિપક્ષીય વાટાઘાટો પહેલાં કહ્યું, 'મને લાગે છે કે ચીન અમારો ઘણો આદર કરે છે. તેઓ ટેરિફના રૂપમાં અમને મોટી રકમ ચૂકવી રહ્યા છે. જેમ તમે જાણો છો, તેઓ 55% ચૂકવી રહ્યા છે, આ ઘણી મોટી રકમ છે. જો આપણે કોઈ સમજૂતી નહીં કરીએ, તો 1 નવેમ્બર સુધીમાં 155% ચૂકવવા પડી શકે છે.'

રિપબ્લિકન નેતાએ જણાવ્યું કે અમેરિકાએ ઘણા દેશો સાથે વેપાર કરાર કર્યા છે, જેમણે પહેલા વૉશિંગ્ટનનો ફાયદો ઉઠાવ્યો હતો. તેમણે કહ્યું, 'હવે વધુ નહીં, મને આશા છે કે અમે ચીનના રાષ્ટ્રપતિ શી જિનપિંગ સાથે ખૂબ જ નિષ્પક્ષ વેપાર કરાર કરી શકીશું. મને લાગે છે કે તમારામાંથી મોટાભાગના લોકો ત્યાં હાજર હશો. આ ખૂબ રોમાંચક હશે.'

'ઘણા દેશોએ ફાયદો ઉઠાવ્યો...'

ટ્રમ્પ ટેરિફને એક રાજદ્વારી હથિયાર માનતા આવ્યા છે અને તેમણે ભારપૂર્વક જણાવ્યું કે તેમનું વહીવટીતંત્ર અનુચિત વેપાર પ્રથાઓ સહન નહીં કરે. તેમના મતે, 'અત્યાર સુધી ઘણા દેશોએ અમેરિકાનો ફાયદો ઉઠાવ્યો, પણ હવે એ શક્ય નથી.'

આ નિવેદન એવા સમયે આવ્યું જ્યારે સમાચાર મળ્યા કે ચીને સપ્ટેમ્બરમાં અમેરિકન સોયાબીનનો એકપણ જથ્થો આયાત કર્યો નથી, જે નવેમ્બર 2018 પછી પ્રથમ વખત બન્યું છે. આનું કારણ એ છે કે ચાલી રહેલા વેપાર તણાવને લીધે ચીની ખરીદદારો દક્ષિણ અમેરિકા તરફ વળ્યા છે.

અગાઉ, ટ્રમ્પે ચીની વસ્તુઓ પર 100% ટેરિફ લાદવાની અને 1 નવેમ્બરથી તમામ મહત્ત્વપૂર્ણ સોફ્ટવેર પર નવા નિકાસ પ્રતિબંધો મૂકવાની યોજના જાહેર કરી હતી. આ પ્રસ્તાવિત શુલ્ક ચીની આયાત પર પહેલેથી લાગુ ટેરિફ કરતાં 55% ટેરિફ વધારે હશે.

'જિનપિંગ સાથે સારા સંબંધ...'

સ્થાનિક સમય મુજબ રવિવારે પત્રકારો સાથેની વાતચીતમાં, ટ્રમ્પે જણાવ્યું કે શી જિનપિંગ સાથે તેમના સંબંધો ખૂબ સારા છે. તેમણે ઉમેર્યું, 'અમારા વચ્ચે કેટલાક મુદ્દાઓ પર મતભેદો છે. તેઓ અમને ટેરિફ સ્વરૂપે મોટી રકમ ચૂકવી રહ્યા છે. કદાચ તેઓ તે ઘટાડવા માંગશે અને અમે તેના પર કામ કરીશું, પરંતુ તેમણે અમને અમુક બાબતો આપવી પણ પડશે.'

તેમણે આગળ કહ્યું, 'મારા પહેલાના વહીવટ અને મારા કાર્યકાળ દરમિયાન તેમણે ઘણી ચૂકવણી કરી હતી. અત્યારે તેઓ અમેરિકાને અવિશ્વસનીય રકમ ચૂકવી રહ્યા છે. કદાચ તેઓ આટલું ચૂકવી ન શકે. અમે તેને ઓછું કરી શકીએ છીએ, પરંતુ તેમણે અમારા માટે પણ કંઈક કરવું પડશે. હવે આ પ્રક્રિયા એકતરફી રહી નથી.'

આ પણ વાંચો: ઈઝરાયલી યુવકની હેવાનિયત કેમેરામાં કેદ! 55 વર્ષીય પેલેસ્ટિની મહિલાને નિર્દયતાપૂર્વક મારી

ટ્રમ્પે પુષ્ટિ કરી કે તેઓ ટૂંક સમયમાં દક્ષિણ કોરિયામાં શી જિનપિંગને મળશે, એમ કહીને કે, 'મને લાગે છે કે જ્યારે અમારી બેઠકો પૂર્ણ થશે, ત્યારે ચીન અને હું એક અત્યંત નિષ્પક્ષ અને ઉત્તમ વેપાર સમજૂતી પર પહોંચીશું, જે બંને દેશો અને સમગ્ર વિશ્વ માટે ખૂબ જ ફાયદાકારક રહેશે.'

ડોનાલ્ડ ટ્રમ્પના આ નિવેદન પહેલાં, અમેરિકી નાણાં મંત્રી સ્કોટ બેસેન્ટે જણાવ્યું હતું કે અમેરિકી અને ચીની અધિકારીઓ આ સપ્તાહે મલેશિયામાં ચર્ચા કરશે, જોકે અહેવાલો સૂચવતા હતા કે ટ્રમ્પ વ્હાઇટ હાઉસ પરત ફર્યા બાદ શી સાથેની તેમની પ્રથમ રૂબરૂ મુલાકાત રદ કરવા અંગે વિચારણા કરી રહ્યા હતા.