સેના બનશે વધુ ઘાતક : સંરક્ષણ મંત્રાલયે આધુનિક ડ્રોન સિસ્ટમ માટે કર્યા રૂ. 1577 કરોડના કરાર

Ministry Of Defence Signs 1577 Crore Deal: ભારતીય સેનાને વધુ આધુનિક અને ઘાતક બનાવવાના હેતુથી સંરક્ષણ મંત્રાલયે એક મોટું પગલું ભર્યું છે. સેના માટે આધુનિક લોઇટર મ્યુનિશન સિસ્ટમ (આકાશમાં હુમલો કરતા ડ્રોન/હથિયાર) ખરીદવા માટે મંત્રાલયે ₹1,577 કરોડના કરાર પર હસ્તાક્ષર કર્યા છે. આ કરાર ભારતની બે જાણીતી ખાનગી કંપની એવી ટાટા એડવાન્સ્ડ સિસ્ટમ્સ લિમિટેડ અને નાઇબ પ્રાઇવેટ લિમિટેડ સાથે કરવામાં આવ્યો છે. આ સોદો ભારતીય કંપનીઓ સાથે થયો હોવાથી દેશની સુરક્ષા મજબૂત થવાની સાથે ડિફેન્સ ક્ષેત્રે ભારતની આત્મનિર્ભરતાને પણ નવી તાકાત મળશે.

નવી દિલ્હીમાં રક્ષાસચિવની હાજરીમાં કરાર

આ મહત્વપૂર્ણ ડીલ નવી દિલ્હી ખાતે સંરક્ષણ સચિવ રાજેશ કુમાર સિંહની હાજરીમાં પૂર્ણ થઈ હતી. આ ડિફેન્સ સોદાની સૌથી ખાસ વાત એ છે કે, તેને 'બાય ઇન્ડિયન' (Buy Indian) કેટેગરી હેઠળ 'ફાસ્ટ ટ્રેક પ્રોસિજર'થી પૂરો કરવામાં આવ્યો છે, જેનો અર્થ એ છે કે, સેનાને આ આધુનિક હથિયાર વિના કોઈ વિલંબે ઝડપથી મળી જશે.

ભારતીય સેના અને આર્ટિલરીને શું ફાયદો થશે?

કામીકાઝ ડ્રોન (સુસાઇડ ડ્રોન): લોઇટર મ્યુનિશન એક પ્રકારનું 'સુસાઇડ ડ્રોન' છે, જે હવામાં લાંબા સમય સુધી મંડરાઈને દુશ્મનના ઠેકાણા કે વાહનની શોધ કરે છે, અને યોગ્ય નિશાન મળતાં જ તેની સાથે અથડાઈને તેને નષ્ટ કરી દે છે.

આર્ટિલરી રેજિમેન્ટની તાકાત વધશે: આ સિસ્ટમ ભારતીય સેનાની તોપખાના (Artillery) રેજિમેન્ટની ક્ષમતામાં અનેક ગણો વધારો કરશે.

સચોટ નિશાન: મુશ્કેલ અને પહાડી વિસ્તારોમાં દુશ્મનના છુપાવાના સ્થળોને અત્યંત સચોટતાથી નિશાન બનાવી શકાશે.

નિષ્ણાતોના મતે, ઘરઆંગણે ટાટા અને નાઇબ જેવી ખાનગી કંપનીઓને આટલો મોટો ઓર્ડર આપવો એ સ્પષ્ટ દર્શાવે છે કે, ભારતનું સંરક્ષણ ઉત્પાદન ક્ષેત્ર હવે અત્યંત મજબૂત બની રહ્યું છે.