‘સ્ટુપિડ’ ઋષભ પંતની સફળતા જોઈ ખુશ થઈ ગયા દિગ્ગજ પૂર્વ ક્રિકેટર, સામે આવ્યું જોરદાર રિએક્શન, જુઓ VIDEO
Summarized by AI; it may make mistakes. Check important info
Summarized by AI; it may make mistakes. Check important info

Sunil Gavaskar Reaction On Rishabh Pant Century : વેલિંગ્ટનના બેસિન રિઝર્વ મેદાન પર ભારત અને ન્યૂઝીલેન્ડ વચ્ચે રમાઈ રહેલી પ્રથમ ટેસ્ટ મેચના ચોથા દિવસે વિકેટકીપર બેટ્સમેન ઋષભ પંતે શાનદાર સદી ફટકારીને સૌના દિલ જીતી લીધા છે. પંતે જેવી પોતાની સદી પૂરી કરી કે તરત જ કોમેન્ટ્રી બોક્સમાં બેઠેલા પૂર્વ ભારતીય દિગ્ગજ સુનીલ ગાવસ્કરે ઊભા થઈને તાળીઓના ગડગડાટ સાથે તેને વધાવી લીધો હતો. ગાવસ્કરના આ રિએક્શનની તસવીરો અને વીડિયો સોશિયલ મીડિયા પર ઝડપથી વાયરલ થઈ રહ્યા છે.
જૂની નારાજગી ભૂલી ગાવસ્કરે કરી દિલ ખોલીને પ્રશંસા
સુનીલ ગાવસ્કરનું આ રિએક્શન ક્રિકેટ ચાહકો માટે ખાસ એટલા માટે બની ગયું છે કારણ કે વર્ષ 2024-25ની બોર્ડર-ગાવસ્કર ટ્રોફી દરમિયાન પંતના એક બેજવાબદાર શોટ પર તેઓ ભારે નારાજ થયા હતા. તે સમયે ગાવસ્કરે લાઈવ કોમેન્ટ્રીમાં પંતને 'સ્ટુપિડ, સ્ટુપિડ, સ્ટુપિડ' કહીને ઝાટકણી કાઢી હતી. જોકે, ન્યૂઝીલેન્ડ સામેની આ ઐતિહાસિક ઈનિંગ બાદ ગાવસ્કરના ચહેરા પર મોટું સ્મિત જોવા મળ્યું હતું અને તેમણે જૂની કડવાશ ભૂલીને યુવા ખેલાડીનો ઉત્સાહ વધાર્યો હતો.
છગ્ગો ફટકારીને પૂરી કરી કારકિર્દીની 9મી ટેસ્ટ સદી
મેચના ત્રીજા દિવસના અંતે 55 રન પર અણનમ રહેલા ઋષભ પંતે ચોથા દિવસે પણ પોતાની આક્રમક રમત ચાલુ રાખી હતી. નાઈટવોચમેન અંશુલ કંબોજ સાથે મળીને દાવ આગળ ધપાવતા પંતે 99 રનના સ્કોર પર પહોંચ્યા બાદ સદી પૂરી કરવા માટે કોઈ સુરક્ષિત રસ્તો અપનાવ્યો ન હતો. તેણે ઓફ-સ્પિનરની બોલિંગમાં મિડ-ઓફ ઉપરથી ગગનચુંબી છગ્ગો ફટકારી 135 બોલમાં પોતાની 9મી ટેસ્ટ સદી પૂરી કરી હતી. સદી ફટકાર્યા બાદ તેણે આકાશ તરફ જોઈને પોતાની જૂની સ્ટાઈલમાં ઉજવણી કરી હતી, જ્યારે અગાઉ ગ્લેન ફિલિપ્સ સામે આગળ વધીને મારેલા છગ્ગા અને રિવર્સ સ્વીપ શોટ્સે દર્શકોને ભરપૂર મનોરંજન પૂરું પાડ્યું હતું.
128 રનની તોફાની ઈનિંગ બાદ રચિન રવીન્દ્રનો શિકાર બન્યો
આક્રમક બેટિંગ કરી રહેલો ઋષભ પંત આખરે 153 બોલમાં 128 રન બનાવીને પેવેલિયન પરત ફર્યો હતો. પોતાની આ યાદગાર ઈનિંગમાં તેણે 10 ચોગ્ગા અને 6 શાનદાર છગ્ગા ફટકાર્યા હતા. ન્યૂઝીલેન્ડના સ્પિનર રચિન રવીન્દ્રના બોલ પર મોટો શોટ મારવાના પ્રયાસમાં બેટની ઉપરની ધાર (ટોપ એજ) વાગતા ડીપ મિડવિકેટ પર ઉભેલા નાથન સ્મિથે તેનો આસાન કેચ ઝડપી લીધો હતો.
4 દેશોમાં સદી ફટકારનાર પ્રથમ એશિયન વિકેટકીપર બન્યો
આ ધમાકેદાર સદી સાથે જ ઋષભ પંતે ક્રિકેટ જગતમાં બે મોટા વિક્રમો પોતાના નામે કરી લીધા છે. તે ન્યૂઝીલેન્ડની ધરતી પર ટેસ્ટ સદી ફટકારનાર પ્રથમ ભારતીય વિકેટકીપર બેટ્સમેન બની ગયો છે. આ ઉપરાંત, દક્ષિણ આફ્રિકા, ઈંગ્લેન્ડ, ન્યૂઝીલેન્ડ અને ઓસ્ટ્રેલિયા એમ ચારેય દેશોમાં ટેસ્ટ સદી નોંધાવનાર પંત પ્રથમ એશિયન વિકેટકીપર પણ બન્યો છે.
ભારતે 720 રન બનાવી ન્યૂઝીલેન્ડની ધરતી પર રચ્યો ઈતિહાસ
ઋષભ પંતના 128 રન ઉપરાંત કેએલ રાહુલે પણ 136 રનની શાનદાર સદીય ઈનિંગ રમી હતી. બંને બેટ્સમેનોના દમદાર પ્રદર્શનના આધારે ભારતીય ટીમે પોતાનો પ્રથમ દાવ 9 વિકેટના નુકસાને 720 રનના વિશાળ સ્કોર પર ડિકલેર કર્યો હતો. ન્યૂઝીલેન્ડની ધરતી પર કોઈપણ વિદેશી કે સ્થાનિક ટીમ દ્વારા ટેસ્ટ ક્રિકેટમાં નોંધાવવામાં આવેલો આ અત્યાર સુધીનો સૌથી મોટો સ્કોર છે.




