ફ્રાન્સ પર કબ્જો કરી રહ્યા છે મુસલમાનો? વિદ્યાર્થી આંદોલનને ટ્રમ્પ કેમ ગણાવી રહ્યા છે 'ઈસ્લામિક ટેકઓવર'

Donald Trump Truth Social France Claim: ફ્રાન્સમાં શાળાઓ અને યુનિવર્સિટીઓના વિદ્યાર્થીઓ હાલ રસ્તા પર આંદોલન માટે ઉતરી આવ્યા છે. આ આંદોલનની શરૂઆત શાળાઓમાં શિક્ષકો, નર્સ અને સ્ટાફની અછતને કારણે થઈ હતી, પરંતુ હવે તેના પર અમેરિકાના રાજકારણની અસર પણ જોવા મળી રહી છે. અમેરિકાના પ્રમુખ ડોનાલ્ડ ટ્રમ્પે ફ્રાન્સમાં થઈ રહેલા પ્રદર્શનોને માત્ર શાળાઓની સમસ્યા માનવાનો ઇનકાર કર્યો છે. તેમણે દાવો કર્યો છે કે, આ અનિયંત્રિત સામૂહિક સ્થળાંતર (ઇમિગ્રેશન) અને ફ્રાન્સ પર ઇસ્લામના કબ્જો કરવાના પ્રયાસ સાથે જોડાયેલું છે.

ટ્રમ્પે 'ટ્રુથ સોશિયલ' પર લખ્યું કે ફ્રાન્સમાં જે થઈ રહ્યું છે તે માત્ર શાળાઓનો મામલો નથી. તેમના મતે, આની પાછળ મોટા પાયે થઈ રહેલું સ્થળાંતર છે અને ઇસ્લામ ફ્રાન્સ પર કબ્જો કરવા માંગે છે. ટ્રમ્પના આ નિવેદન પછી સૌથી મોટો સવાલ એ ઊભો થાય છે કે, ફ્રાન્સમાં વાસ્તવિકતા શું છે? શું ખરેખર આ આંદોલન ધર્મ અને ઇમિગ્રેશનને લઈને છે કે પછી બીજી કોઈ કહાની?

ફ્રાન્સમાં આખરે શું થઈ રહ્યું છે?

હાલના આંદોલનની શરૂઆત પેરિસ નજીકના એક શહેરની હાઈસ્કૂલથી થઈ હતી. અહીં વિદ્યાર્થીઓની ફરિયાદ છે કે, વર્ગમાં 32-35 બાળકો છે, પરંતુ શાળામાં ન તો નર્સ છે, કે ન તો પૂરતા શિક્ષકો. દિવ્યાંગ બાળકોની મદદ કરતો સ્ટાફ (AESH) પણ ઓછો છે. 21 સપ્ટેમ્બરે વિદ્યાર્થીઓ પ્રદર્શન કરી રહ્યા હતા. શરૂઆતમાં આ આંદોલન એક શાળા પૂરતું સિમિત હતું, પરંતુ ત્યારબાદ બીજી શાળાઓના વિદ્યાર્થીઓ પણ જોડાયા. હવે ફ્રાન્સના અલગ-અલગ વિસ્તારોની શાળાઓ બહાર બ્લોકેડ લાગેલા છે. આ આંદોલન એવા સમયે વધી રહ્યું છે, જ્યારે ફ્રાન્સમાં બજેટને લઈને પણ દબાણ છે. ફ્રેન્ચ વડા પ્રધાન સેબેસ્ટિયન લેકોર્નૂ 2027ના બજેટમાં 54 અબજ યુરોની બચત કરવાની યોજના જણાવી રહ્યા છે, અને સરકારી કર્મચારીઓના પગાર ફ્રીઝ કરવાની વાત ચાલી રહી છે. ઇમેન્યુઅલ મેક્રોન શાસનનું કહેવું છે કે, બજેટ કાપને લઈને લોકોમાં અફવાઓ ફેલાઈ છે.

શું આંદોલનમાં હિંસા પણ થઈ રહી છે?

આંદોલન દરમિયાન કેટલાક વિસ્તારોમાં હિંસા પણ થઈ છે. શાળા અને યુનિવર્સિટીના વિદ્યાર્થીઓ સાથે હવે ટ્રેડ યુનિયનો પણ જોડાઈ રહ્યા છે. ફ્રેન્ચ ગૃહ મંત્રાલય 2,66,000 લોકો સામેલ હોવાની વાત કરી રહ્યું છે, જ્યારે વિદ્યાર્થી સંગઠન USL 4,50,000 લોકો સામેલ હોવાનો દાવો કરી રહ્યું છે. વડા પ્રધાનના જણાવ્યા મુજબ, 215 વિદ્યાર્થીઓ અને 85 શાળા કર્મચારીઓ ઘાયલ થયા છે. ન્યાય મંત્રાલયે 6,000 થી વધુ ધરપકડોની માહિતી આપી છે. 100 થી વધુ શાળાઓને નુકસાન પહોંચ્યું છે. માર્સેઈમાં આગ બુઝાવવા પહોંચેલા ફાયર બ્રિગેડના ટ્રકને પણ સળગાવી દેવામાં આવ્યો હતો. જોકે, ફ્રેન્ચ સરકાર આમાં કેટલાક ઉગ્ર વામપંથી કાર્યકરો અને બહારના ઉપદ્રવીઓની ભૂમિકા તરફ ઈશારો કરી રહી છે, જ્યારે હજારો વિદ્યાર્થીઓ શાળાઓની સુવિધાઓ અને સ્ટાફ માટે પ્રદર્શન કરી રહ્યા છે.

ટ્રમ્પ કેમ ગણાવી રહ્યા છે ઈસ્લામિક આંદોલન?

અમેરિકાના પ્રમુખ ડોનાલ્ડ ટ્રમ્પ ફ્રાન્સના વિદ્યાર્થી આંદોલનને ધાર્મિક રંગ આપવાનો પ્રયાસ કરી રહ્યા છે. વિદ્યાર્થીઓની શરૂઆતની માંગણીઓમાં શિક્ષકો, નર્સ, સ્ટાફ અને શાળાના સંસાધનો સામેલ છે. આ આંદોલન ઇમિગ્રેશન કે ઇસ્લામને લઈને શરૂ થયું નહોતું. આમ છતાં, ટ્રમ્પ આ સમગ્ર વિવાદને ઇમિગ્રેશન અને ઇસ્લામ સાથે જોડી રહ્યા છે. ટ્રમ્પના નિવેદનથી એવો સંદેશ જઈ રહ્યો છે કે, ફ્રાન્સમાં શાળાઓથી જોડાયેલી ફરિયાદ પાછળ વસ્તી વિષયક ફેરફારો અને ઇસ્લામનો વધતો પ્રભાવ છે. પરંતુ ફ્રેન્ચ અધિકારીઓ તરફથી સામે આવી રહેલી માહિતી અનુસાર વિદ્યાર્થીઓ કોઈ સંગઠિત ઈસ્લામિક એજન્ડા હેઠળ પ્રદર્શન કરી રહ્યા નથી.

ટ્રમ્પનો આ દ્રષ્ટિકોણ ક્યાંથી આવી રહ્યો છે?

અમેરિકાના પ્રમુખના નિવેદનને અમેરિકી અને યુરોપીય દક્ષિણપંથી (રાઈટ-વિંગ) રાજકારણના સંદર્ભમાં સમજી શકાય છે. આ રાજકારણમાં યુરોપના ઘણા વિરોધ પ્રદર્શનોને ઇમિગ્રેશન, ઇસ્લામ અને સુરક્ષાના મુદ્દાઓ સાથે જોડીને જોવામાં આવે છે. ટ્રમ્પ લાંબા સમયથી સખત બોર્ડર પોલિસીના સમર્થક રહ્યા છે, અને તેઓ ફ્રાન્સની અશાંતિને અમેરિકી ચર્ચા માટે એક ઉદાહરણ તરીકે રજૂ કરી રહ્યા છે.

સોશિયલ મીડિયા સ્ટોરી કેવી રીતે બદલી રહ્યું છે?

સોશિયલ મીડિયા પર સૌથી વધુ ભ્રમ પેદા થઈ રહ્યો છે. 'ફ્રાન્સ 24' ના ફેક્ટ-ચેક મુજબ, એલેક્સ જોન્સ અને ટોમી રોબિન્સન જેવા દક્ષિણપંથી ચહેરાઓ જૂના અને બીજી ઘટનાઓના વીડિયો શેર કરીને તેને વર્તમાન પ્રદર્શનો સાથે જોડી રહ્યા છે. કેટલાક વીડિયો સાથે એવો દાવો કરવામાં આવી રહ્યો છે કે, ફ્રાન્સમાં ઈસ્લામિક વિદ્રોહ થઈ રહ્યો છે. એક વાયરલ વીડિયો ડિસેમ્બર 2022નો નીકળ્યો હતો, જે પેરિસમાં કુરદ સમુદાય પર થયેલા ગોળીબાર પછીના પ્રદર્શનનો હતો. પ્રદર્શનોમાં કેટલીક જગ્યાએ પેલેસ્ટાઇનના ઝંડા સાથે પણ લોકોને પ્રદર્શન કરતા જોવામાં આવ્યા છે. ફ્રાન્સના અધિકારીઓએ ટ્રમ્પના ધાર્મિક આક્ષેપોને ફગાવી દીધા છે, અને સ્પષ્ટ કર્યું છે કે પ્રદર્શનકારીઓ મુખ્યત્વે શાળાઓની સુવિધાઓ માટે અવાજ ઉઠાવી રહેલા વિદ્યાર્થીઓ જ છે.