2025માં વિશ્વમાં 128 પત્રકારોની હત્યા: ગાઝામાં સર્વાધિક મોત, ભારતનો આંકડો ચોંકાવનારો

2025 Journalist Died News : પત્રકારોની સુરક્ષા માટે કામ કરતી વૈશ્વિક સંસ્થા IFJ ના અંતિમ રિપોર્ટ અનુસાર, વર્ષ 2025 માં કુલ 128 પત્રકારો અને મીડિયાકર્મીઓએ જીવ ગુમાવ્યો છે. આ આંકડામાં 10 મહિલા પત્રકારોનો પણ સમાવેશ થાય છે. અહેવાલમાં જણાવ્યા મુજબ, કુલ મૃત્યુના 58 ટકા હિસ્સો માત્ર મધ્ય પૂર્વ (મિડલ ઈસ્ટ) અને અરબ દેશોમાં નોંધાયો છે, જે આ પ્રદેશને પત્રકારો માટે વિશ્વનો સૌથી ખતરનાક વિસ્તાર બનાવે છે.

ગાઝામાં ભયાનક સ્થિતિ: ઇઝરાયલ-હમાસ સંઘર્ષની અસર

રિપોર્ટ અનુસાર, એકલા પેલેસ્ટાઈન (ગાઝા) માં 56 પત્રકારો માર્યા ગયા છે. આ પત્રકારો ઇઝરાયલ અને હમાસ વચ્ચે ચાલી રહેલા યુદ્ધનું કવરેજ કરી રહ્યા હતા.

સૌથી ક્રૂર ઘટના

10 ઓગસ્ટ 2025 ના રોજ અલ જઝીરાના પત્રકાર અનસ અલ-શરીફ અને અન્ય પાંચ મીડિયાકર્મીઓ પર ગાઝા સિટીની અલ શિફા હોસ્પિટલ બહાર પત્રકારોના તંબુમાં થયેલો ટાર્ગેટેડ હુમલો વર્ષની સૌથી કરૂણ ઘટનાઓમાંની એક હતી.

ભારત સહિત અન્ય દેશોની સ્થિતિ

IFJ ના ડેટા મુજબ, પત્રકારોની હત્યાના મામલે અન્ય દેશોની સ્થિતિ પણ ચિંતાજનક છે:

યમન: 13 પત્રકારોની હત્યા.

યુક્રેન: 8 પત્રકારોના મોત.

સૂદાન: 6 પત્રકારોની હત્યા.

ભારત અને પેરુ: બંને દેશોમાં 4-4 પત્રકારો માર્યા ગયા.

પાકિસ્તાન, મેક્સિકો અને ફિલિપાઈન્સ: દરેકમાં 3-3 મોત નોંધાયા.

વિશ્વની સૌથી મોટી 'પત્રકાર જેલ': ચીન મોખરે

માત્ર હત્યા જ નહીં, પત્રકારોને જેલમાં ધકેલવાની પ્રવૃત્તિમાં પણ વધારો થયો છે. હાલમાં વિશ્વભરમાં 533 પત્રકારો જેલમાં બંધ છે.

એશિયા-પેસિફિક: આ ક્ષેત્રમાં સૌથી વધુ 277 પત્રકારો કેદ છે.

ચીન: હોંગકોંગ સહિત 143 પત્રકારો ને જેલમાં રાખીને ચીન વિશ્વનું સૌથી મોટું 'પત્રકાર જેલર' બન્યું છે. ત્યારબાદ મ્યાનમાર (49) અને વિયેતનામ (37) નો નંબર આવે છે.

IFJ મહાસચિવની અપીલ

IFJ ના મહાસચિવ એન્થોની બેલેન્જરે આ સ્થિતિને 'વૈશ્વિક સંકટ' ગણાવ્યું છે. તેમણે સરકારોને અપીલ કરી છે કે પત્રકારોની સુરક્ષા માટે તાત્કાલિક પગલાં લેવામાં આવે અને હત્યારાઓને સખત સજા કરવામાં આવે. તેમણે ભારપૂર્વક જણાવ્યું કે, "દુનિયા હવે વધુ રાહ જોઈ શકે તેમ નથી, પ્રેસની સ્વતંત્રતા જાળવી રાખવી એ સમયની જરૂરિયાત છે."

નોંધનીય છે કે 1990 થી અત્યાર સુધીમાં IFJ એ કુલ 3,173 પત્રકારોના મૃત્યુનું દસ્તાવેજીકરણ કર્યું છે.