સેલવાસમાં તરૂણ સાથે સૃષ્ટિ વિરૂદ્ધનું કૃત્ય કરવાના કેસમાં યુવાનને 20 વર્ષની કેદ

Silvassa Court : સેલવાસ કૂડાચા ગામે વર્ષ 2024માં 13 વર્ષીય તરૂણ સાથે સૃષ્ટિ વિરૂદ્ધ કૃત્ય કરવાના ગુનામાં સેલવાસ ડિસ્ટ્રીકટ એન્ડ સેશન્સ કોર્ટે આરોપીને તકસીરવાર ઠેરવી 20 વર્ષની કેદની સજા અને રૂ.25 હજારનો દંડ ફટકારતો મહત્વનો ચૂકાદો આપ્યો હતો. ભોગબનનાર તરૂણ ઘરેથી ટયુશને જવા નીકળ્યો ત્યારે પાડોશી વિધર્મી યુવાન મોઢુ દબાવી તેની રૂમમાં લઈ ગયા બાદ ગંભીર કૃત્ય કર્યું હતું.

 કેસની વિગત એવી છે કે, સેલવાસના કૂડાચા ગામે એક પરપ્રાંતિય પરિવાર રહે છે. ગત તા.26-3-24ના રોજ પરિવારનું દંપતિ સવારે રાબેતા મુજબ કંપનીમાં નોકરી પર ગયું હતું. જયારે પરિવારનો 13 વર્ષીય અશોક (નામ બદલ્યું છે.) રાબેતા મુજબ ઘર નજીક આવેલા ટયુશન કલાસમાં ટયુશન પર જવા નીકળ્યો હતો. તે દરમિયાન રસ્તામાં અચાનક પાડોશમાં રહેતો રૂસ્તમ અલાઉદીન ખાન ધસી જઈ અશોકનું મોઢું દબાવી તેની રૂમમાં લઈ ગયા હતો. બાદમાં રૂમનો દરવાજો બંધ કરી અશોકના ગુપ્તાંગ સાથે છેડછાડ કરી સૃષ્ટિ વિરૂદ્ધનું કૃત્ય કરવાનો પ્રયાસ કર્યો હતો. જો કે અશોકને નીચે ઊંઘવા જણાવતા જ અશોક રૂસ્તમની નજર ચૂકવી રૂમમાંથી પોતાના ઘરે ચાલી ગયો હતો.

ગભરાયેલા અશોકે પરિવારને રૂસ્તમ ખાનના ગંભીર કૃત્ય અંગે આખી બીના જણાવતા પરિવાર સ્તબ્ધ બની ગયું હતું. અશોકના પરિવારજનો પોલીસ મથકે પહોંચી ફરિયાદ નોંધાવી હતી. પોલીસે ગંભીર ગુનામાં રૂસ્તમ ખાનની ધરપકડ કરી મેડિકલ પરિક્ષણ પણ કરાવ્યું હતું. સેલવાસ પોલીસે આ કેસમાં ચાર્જશીટ પણ દાખલ કરી દીધી હતી. સેલવાસ સૅશન્ડ એન્ડ ડિસ્ટ્રીકટ કોર્ટમાં હાથ ધરાયેલી સુનાવણીમાં સરકારી વકીલ નિપૂણાબેન રાઠોડે ભોગ બનનાર સહિત અનેક લોકોની જુબાની, મેડિકલ રિપોર્ટ સહિત અનેક પુરાવા સાથે દલીલો કરી હતી. જજ વિભા પી.ઈગલેએ આરોપી રૂસ્તમ ખાનને તકસીરવાર ઠેરવી 20 વર્ષની કેદની સજા અને રૂ.25 હજારનો દંડ ફટકારતો મહત્વનો ચૂકદો આપ્યો છે. દંડની રકમ નહીં ભરે તો વધુ 6 માસની કેદની સજાની જોગવાઈ કરી છે.