નર્મદા કેનાલમાં વડોદરાનો યુવાન ડૂબ્યો: શોધખોળ છતાં મળ્યો નહીં

વડોદરા, તા. 19 

વડોદરા શહેર નજીક આવેલા નિમેટા ગામ પાસેના છુછાપુરા ગામે યુવાન નર્મદા નદીની કેનાલમાં ડૂબી જતા ભાગદોડ મચી ગઈ હતી. ફાયર બ્રિગેડની ટીમ દ્વારા તેની શોધખોળ કરવા છતાં યુવાનનો કોઈ પત્તો લાગ્યો ન હતો.

શહેર નજીકના નિમેટા સાથેના છુછાપુરા ગામમાં આવેલી નર્મદા કેનાલના કિનારે ગઇકાલના રોજ વાઘોડિયા રોડ પર રહેતો યશરાજ નામનો યુવાન ફરવા ગયો હતો. દરમિયાન કેનાલના કિનારે તેણે એક છોકરાને મોબાઇલમાં કશું કરતો હોવાનો જોયો હતો. તે અત્યંત કેનાલની પાસે ઢાળ પર હોવાથી યશરાજે યુવાનને ત્યાંથી દૂર ખસી જવા માટે ટોક્યો હતો. જે બાદ થોડી ક્ષણમાં યુવાનનો પગ લપસતા તે કેનાલમાં ખાબકયો હતો. સમગ્ર ઘટનાને નજરે જોનાર યશરાજે આ અંગેની જાણ તુરંત બ્રિગેડને કરી હતી. ફાયર બ્રિગેડનો કાફલો ઘટના સ્થળે દોડી આવ્યો હતો અને ડૂબી ગયેલા જીતેશ જોષી (રહે. નવજીવન સોસાયટી, આજવા રોડ)ની શોધખોળ હાથ ધરી હતી. પરંતુ યુવાનની કોઈ ભાળ મળી ન હતી. સમગ્ર બનાવ મામલે યુવાનના પરિવારને જાણ કરવામાં આવી છે.