જામનગરમાં પૈસાની લેતીદેતીના મામલે યુવાન પર ધારદાર હથિયાર વડે હુમલો : બે શખ્સો સામે હુમલાની ફરિયાદ

Jamnagar Crime : જામનગર શહેરમાં પૈસાની લેતીદેતીના મામલે એક યુવાન પર બેફામ હુમલો થયાની ઘટના સામે આવી છે. સીટી એ-ડીવી પોલીસ સ્ટેશન વિસ્તારમાં બનેલી આ ઘટનામાં પોલીસે બે આરોપીઓ વિરુદ્ધ ગુનો નોંધ્યો છે.

ફરિયાદ મુજબ, કાલાવડ નાકા બહાર સનસિટી-01, રાજ સોસાયટી વિસ્તારમાં મધરાત્રીના સમયે અફઝલ અબ્દુલ કાદર શમા નામના 32 વર્ષના ગરાણા યુવાનને બે આરોપીઓ અબ્દુલભાઈ સુમરા અને સલીમભાઈ સુમરા વગેરે ફરિયાદીને રોકી પૈસાની બાબતે બોલાચાલી શરૂ કરી હતી. બાદમાં વાત વધતા આરોપી અબ્દુલભાઈ સુમરાએ લોખંડના પાઈપથી ફરિયાદીના માથામાં હુમલો કર્યો હતો, જેના કારણે તેને ગંભીર ઈજા પહોંચી અને ટાંકા લેવા પડ્યા હતા.

આ દરમિયાન અન્ય આરોપી સલીમભાઈ સુમરા પણ ત્યાં આવી પહોંચતા બન્નેએ મળીને ફરિયાદીને ઢીકાપાટુનો માર માર્યો હતો, તેમજ જાનથી મારી નાખવાની ધમકી આપી હતી. આ બનાવ અંગે પોલીસે ભારતીય ન્યાય સંહિતા-2023ની વિવિધ કલમો તેમજ જી.પી. એક્ટ હેઠળ ગુનો નોંધ્યો છે અને વધુ તપાસ હાથ ધરી છે.