વડોદરામાં ઢોલ-નગારા સાથે પ્રચારમાં નીકળેલા ભાજપના ઉમેદવારોને મતદારોએ ઘેર્યા : ઉગ્ર બોલાચાલી

Vadodara : વડોદરા શહેરની રાવપુરા વિસ્તારમાં આવેલી કાપડી પોળમાં ઉભરાતી ગટરોના પ્રશ્નોથી સ્થાનિકોમાં ભારે રોષ વ્યાપ્યો છે. ચૂંટણી પ્રચારમાં ઢોલ નગારા સાથે આવતા ઉમેદવારો સામે સ્થાનિકો પ્રાથમિક સુવિધાના પ્રશ્નો અંગે સતત સવાલો ઉઠાવતા જોવા મળ્યા હોવાનો વિડીયો વાયરલ થયો હતો. 

વડોદરા મહાનગર પાલિકાની ચૂંટણી આગામી તા. 26મીએ યોજાશે. આ અંગે ઉમેદવારોના ફોર્મની ચકાસણી પણ થઈ ગઈ છે ત્યારબાદ હવે ઉમેદવારોએ પોતપોતાના વિસ્તારમાં ચૂંટણી પ્રચાર માટે ઢોલ નગારાના તાલે મતદારોને આકર્ષવા ઘરે ઘરે રૂબરૂ સંપર્ક કરવાનું શરૂ કર્યું હતું. આવી જ રીતે શહેરની મધ્યમાં આવેલા રાવપુરા વિસ્તારની કાપડી પોળમાં ઢોલ નગારા વગાડતા કાર્યકરો સાથે ઉમેદવારોએ મતદારોનો રૂબરૂ સંપર્ક કરવાનું શરૂ કર્યું હતું. 

જ્યારે બીજી બાજુ કાપડી પોળમાં ગટરના ગંદા પાણી ઉભરાવવાનો કાયમી પ્રશ્ન હોવાથી સ્થાનિકોએ પ્રચારમાં આવનારા ઉમેદવારો સમક્ષ પ્રાથમિક સુવિધાઓ અંગે સવાલો ઉઠાવવાનું શરૂ કર્યું હતું. આ ઘટના વખતે સ્થાનિકોએ પોતાના વિવિધ સ્થાનિક પ્રશ્નો અંગે અને સુવિધાઓ નહિ મળવા બાબતે પણ ઉમેદવારો સમક્ષ સતત પ્રશ્નોનો મારો વરસાવ્યો હતો. જેથી ઉમેદવારો અને સ્થાનિક રહીશો વચ્ચે ઉગ્ર બોલાચાલી થઈ હતી અને ઉગ્ર વાતાવરણ જોઈને આખરે ઉમેદવારોને ચુપકીદી સેવીને સ્થળ છોડીને ચાલ્યા જવાની ફરજ પડી હતી.