Vadodara : વડોદરા શહેરના વાડી વિસ્તારના શાસ્ત્રીબાગ નજીક આવેલા કોટિયાર્કનગરમાં રહેણાંક વિસ્તારમાં અનઅધિકૃત રીતે ચલાવવામાં આવી રહેલા ગોડાઉન સામે મ્યુનિસિપલ કોર્પોરેશનની ટાઉન પ્લાનિંગ શાખાએ સીલ મારવાની કાર્યવાહી હાથ ધરી છે.
મ્યુનિસિપલ કોર્પોરેશનની ટાઉન પ્લાનિંગ શાખાના બિલ્ડિંગ ઇન્સ્પેક્ટર ગૌતમ શર્મા સહિતની ટીમે આજે સ્થળ પર પહોંચી મકાન સીલ કરવાની કાર્યવાહી કરી છે. રહેણાંક હેતુ માટે મંજૂર વિસ્તારમાં કોમર્શિયલ પ્રવૃત્તિ શરૂ કરવામાં આવતા સ્થાનિક રહેવાસીઓએ તંત્ર સમક્ષ ફરિયાદ નોંધાવી હોવાનું જાણવા મળે છે.
મકાનમાં હાઉસ ક્લીનીંગ માટેના કેમિકલનું ગોડાઉન ચલાવવામાં આવતાં અવરજવર અને અન્ય કારણોસર આસપાસના રહીશોને મુશ્કેલીઓનો સામનો કરવો પડી રહ્યો હતો. ફરિયાદના આધારે તપાસ હાથ ધરાયા બાદ બિનપરવાનગી કોમર્શિયલ ઉપયોગ સામે કાર્યવાહી કરવામાં આવી હતી. પાણીગેટ પોલીસ સ્ટેશનના બંદોબસ્ત વચ્ચે ટાઉન પ્લાનિંગ શાખાની ટીમે A-55 નબરનું મકાન સીલ કર્યું છે.
