વાસણા તળાવથી વાસણા જકાતનાકા સુધી વાસણા - બાંકો કાંસ ઢાંકી દેવાશે

વડોદરા,શહેરના વોર્ડ નં. ૧૦માં વાસણા તળાવથી વાસણા જકાતનાકા સુધીના ખુલ્લા વાસણા-બાંકો કાંસ પર સ્લેબ ભરવો જરૃરી બન્યો છે. જાહેર સુરક્ષાને ધ્યાનમાં રાખીને આ કામગીરી ૧.૨૮ કરોડના ખર્ચે કરવામાં આવનાર છે.

કોર્પોરેશનની સ્ટેન્ડિંગ સમિતિમાં આ માટેની દરખાસ્ત પણ રજૂ કરવામાં આવતા તેને મંજૂરી આપવામાં આવી છે. વોર્ડ નં.૧૦ના વિસ્તારમાં વાસણા તળાવથી વાસણા જકાતનાકા સુધીના ભાગના રહેણાંક વિસ્તારમાં જુનો ખુલ્લો વાસણા-બાંકો કાંસ છે. જેના લીધે ચોમાસામાં ભારે વરસાદ પડતા અને પાણી ભરાય ત્યારે જોખમી બની જાય છે. વિસ્તારના નાગરીકોની જાહેર આરોગ્યની સ્થિતિ તેમજ જાહેર સલામતીને ધ્યાને રાખી બાંકો કાંસ પર સ્લેબ ભરવાની કામગીરી કરવી જરૃરી ગણાવી છે. અવારનવાર આ મુદ્દે રજૂઆતો પણ કરવામાં આવી છે. આ કામગીરી અર્થે વરસાદી ગટરના એમ્પેનલ્ડ થયેલ પ્રોજેક્ટ મેનેજમેન્ટ કન્સલ્ટન્ટ ધ્વારા અંદાજે ૩૨૦ રનીંગ મીટર લંબાઇમાં આર.સી.સી. બીમ સાથે કાંસ ઉપર સ્લેબ ભરવાની કામગીરી કરવા કહ્યું હતું.