લોકોની સુરક્ષા માટે દોડતા વડોદરા ફાયર બ્રિગેડના જવાનો પોતાની સલામતી માંગે છે, વીજળીક હડતાલ પર ઉતર્યા

Vadodara Fire Brigade : વડોદરા કોર્પોરેશન દ્વારા સંચાલિત ફાયર બ્રિગેડના 100 થી વધુ કર્મચારીઓના લાંબા સમયથી પગાર તેમજ અન્ય મુદ્દાઓનો ઉકેલ નહીં આવતા આજે વીજળીક હડતાલ પર ઉતરી જતા કોર્પોરેશનના અધિકારીઓએ દોડધામ કરી મૂકી છે. 

વડોદરા ફાયર બ્રિગેડના 100 થી વધુ હંગામી કર્મચારીઓમાં કેટલાક કર્મચારી 15 વર્ષથી ફરજ બજાવી રહ્યા છે. પરંતુ તેમનો પગાર નિયમિત થતો નથી તેમજ પગારમાં વધારો પણ થતો નથી. નામદાર કોર્ટ દ્વારા કર્મચારીઓની તરફેણમાં હુકમ કરવામાં આવ્યો હોવા છતાં કોર્પોરેશન દ્વારા કોઈ કાર્યવાહી કરવામાં આવી નહોતી અને ઉપલી અદાલતમાં તેમના હુકમને પડકારવાની તજવીજ કરવામાં આવી છે.

પરિણામે આજે ફાયર બ્રિગેડના ડ્રાઇવરો એકાએક હડતાલ પર ઉતરી ગયા હતા અને નવલખી કમ્પાઉન્ડમાં ભેગા થઈ આગામી કાર્યક્રમો નક્કી કરવા માટે ચર્ચા કરી રહ્યા છે. કર્મચારીઓએ હૈયા વરાળ ઠાલવતા કહ્યું હતું કે, કોન્ટ્રાક્ટર રીન્યુ થાય કે ન થાય તે જોવાની જવાબદારી કોર્પોરેશનની છે. અમારા પરિવારજનોએ શા માટે વેઠવું. 

તેમણે જણાવ્યું હતું કે આજે 19 તારીખ થઈ હોવા છતાં અમારી રજૂઆતો કોઈએ સાંભળી નથી અને હજી પગાર થયો નથી. જેને કારણે અમારા છોકરાઓની સ્કૂલ ફી, ટ્યુશનફી, શિક્ષણના ખર્ચ ઉપરાંત લાઈટ બિલ ગેસ બિલ સહિતના ખર્ચ કાઢવા મુશ્કેલ પડ્યા છે. કેટલાક લોકોના વીજ કનેક્શન પણ કાપી નાખવામાં આવ્યા છે. જેથી ના છૂટકે અમારે આજે હડતાલનો નિર્ણય લેવો પડ્યો છે. 

બીજી તરફ કોર્પોરેશન દ્વારા વિહિકલપુલમાંથી તાત્કાલિક ડ્રાઇવરો મંગાવી હાલ પૂરતી ફાયર બ્રિગેડની કામગીરી સંભળી લેવામાં આવી છે.