વડોદરામાં નશેબાજ ટ્રક ચાલકે સોસાયટીના કોમન દિવાલમાં ટ્રક ઘુસાડી દીધી

Vadodara Accident : વડોદરાના પ્રતાપ નગર રોડ વિહાર ટોકીઝની પાછળ આદર્શ નગર સોસાયટીમાં રહેતા એડવોકેટ ભાવેશ વિજયભાઈ કહારે વાડી પોલીસ સ્ટેશનમાં ફરિયાદ નોંધાવી જણાવ્યું છે કે ગઈકાલે બપોરે પોણા ચાર વાગે હું મારા ઘરના કમ્પાઉન્ડમાં મારા માતા સાથે બેઠો હતો. ત્યારે કંઈક અથડાવવાનો અવાજ આવતા હું બહાર જોવા ગયો હતો. મેં જોયું તો એક આઇસર ટ્રકના ચાલકે બેદરકારીથી તેને ટ્રક રિવર્સમાં લઈ અમારી સોસાયટીની કોમન દીવાલને અથાડી હતી અને ત્યારબાદ તે ટ્રક લઈને તેની ઓફિસ ટીસીઆઇ એક્સપ્રેસ ખાતે જતો રહ્યો હતો.

ત્યારબાદ હું તથા સોસાયટીના રહીશો તેની પાસે ગયા હતા અને ટ્રક ચાલકને નીચે ઉતારી પૂછતા તેણે પોતાનું નામ સુરેન્દ્રસિંહ શિવરાજસિંહ યાદવ જણાવ્યું હતું. તેણે દારૂનો નશો કર્યો હોવાનું જણાઈ આવ્યું હતું. સોસાયટીના રહીશોએ ટ્રક ચાલકને પકડી રાખી વાડી પોલીસને જાણ કરી હતી. વાડી પોલીસે ટ્રક ચાલક સામે ગુનો દાખલ કરી કાયદેસરની કાર્યવાહી હાથ ધરી છે. સદનસીબે આ ઘટનામાં કોઈને ઈજા થઈ ન હતી.