વડોદરા શહેરમાં અછોડા તોડ, ચોરીની ઘટનાઓમાં મંકી માસ્કનો ઉપયોગ : પ્રતિબંધનો કડક અમલ જરૂરી

Vadodara Police : વડોદરા શહેરમાં હાલ ગુનાખોરી વધી રહી છે ત્યારે લોકો મંકી માસ્ક પહેરીને ખુલ્લેઆમ ફરી રહ્યા છે. અગાઉ બનેલી ક્રાઈમની ઘટનાઓને અંજામ આપનારા મંકી માસ્ક પહેરનારા હોવાનો ઘટસ્ફોટ થયો હતો. પરિણામે મંકી માસ્ક પર તત્કાલીન શહેર પોલીસ કમિશનર દ્વારા પ્રતિબંધ મુકાયો હતો. પરંતુ હાલની કેટલીક ક્રાઈમની ઘટનાઓ પર ફરી એકવાર મંકી માસ્ક પહેરીને ઘટનાને અંજામ અપાયો હોવાનું તારણ બહાર આવ્યું છે. જ્યારે બીજી બાજુ મંકી માસ્ક પહેરીને વાહન ચાલકો સરેઆમ નજરે પડે છે, ત્યારે આ પરિપત્ર જાહેરનામાનો વધુ કડકાઇથી અમલ થવો અત્યંત ગુનાખોરી ડામવામાં મદદરૂપ બની શકે છે. 

ઉલ્લેખનીય છે કે, શહેરમાં દિન પ્રતિદિન ગુનાખોરી વધી રહી છે ત્યારે વાહન ચાલકો સહિત રાહદારીઓ મંકી માસ્ક પહેરીને જાહેરમાં ફરતા જણાય છે. જોકે મંકી માસ્ક પર તત્કાલીન શહેર પોલીસ કમિશનર દ્વારા પ્રતિબંધ ફરમાવવામાં આવ્યો હતો. જોકે અગાઉ શહેરમાં બનતી અછોડા તોડવાની ઘટના, નાની મોટી લૂંટની ઘટના બનતી હતી. આ અંગે પોલીસ તપાસમાં ગુનાખોરીને અંજામ આપનાર મંકી માસ્ક પહેરનારા હોવાનો ખુલાસો થયો હતો. પરિણામે તત્કાલીન પોલીસ કમિશનર દ્વારા મંકી માસ્ક પર સરેઆમ પ્રતિબંધ મૂકવામાં આવ્યો હતો. 

દરમિયાન હાલમાં પણ શહેરમાં અછોડા તોડ અને ચોરીની ઘટનાઓ વધી ગઈ છે. જ્યારે બીજી બાજુ અનેક દ્વિ ચક્રી વાહન ચાલકો મંકી માસ્ક પહેરીને ખુલ્લેઆમ પોતાના વાહન ચલાવતા નજરે પડી ગયા છે. આ બાબતે તત્કાલીન શહેર પોલીસ કમિશનરના જાહેરનામાનો અમલ હળવો થયો હોવાનું માની શકાય. પરંતુ હવે જ્યારે ચોરી અને અછોડા તોડની ઘટનાઓ બને ત્યારે મંકી માસ્ક પહેરનારા કેટલાક શકમંદોને તપાસવા અત્યંત જરૂરી બની રહે છે. આ ઉપરાંત મંકી માસ્ક પર મુકાયેલા પ્રતિબંધનો કડક અમલ થાય એ પણ અત્યંત જરૂરી છે. ₹

કોરોના કાળમાં લોકો મંકી માસ્ક પહેરતા થયા₹

કોરોના વાયરસથી બચવા માટે કરાયેલા સૂચનો પૈકીનું એક સૂચન એવું પણ હતું કે મોઢું અને નાક ઢાંકીને રાખવા જોઈએ. પરિણામે મંકી માસ્કનો વપરાશ વધ્યો હતો. પરંતુ હવે કોરોના કાળનો અંત આવી ગયો છે. આમ છતાં સાવચેતીના ભાગરૂપે કેટલાક લોકો માસ્ક પહેરીને ફરતા હોય છે. પરંતુ મંકી માસ્ક પહેરીને ફરવું હવે યોગ્ય નથી. આમ છતાં પણ હાલ ઠંડીની સિઝનમાં દ્વિચક્રી વાહન ચાલકો આવા મંકી માસ્ક પહેરીને સ્વાસ્થ્યના કારણોસર ફરતા હોય છે.