અસામાન્ય,અસહ્ય અગનવર્ષા, રાજકોટ-સુરેન્દ્રનગર રેડ એલર્ટ

સૌથી વધુ વલ્લભવિદ્યાનગરમાં ૪૨.૩ ,રાજકોટ ૪૧.૯ 

દિવમાં બીજા દિવસે  નોર્મલથી ૯ સે.વધુ!  અમદાવાદ, વડોદરા, સુરેન્દ્રનગર ૪૧સે.થી વધુ, સુરત, અમરેલી, કેશોદ, વેરાવળ ૪૧ સે.

આજે પણ રાજકોટ, સુરેન્દ્રનગરમાં સિવિયર હીટવેવ, પોરબંદર, મોરબી, કચ્છ, જુનાગઢ, વડોદરામાં હીટવેવ

રાજકોટ: ગુજરાતમાં અગાઉ બે દિવસ બાદ તાપમાન ઘટવાની આગાહી હતી પરંતુ, હીટવેવ વધુ ભીષણ બનીને લંબાયો છે. આજે રાજકોટ, સુરેન્દ્રનગર જિલ્લામાં તાપમાનનું રેડ એલર્ટ જારી કરાયું હતું તો આવતીકાલે પણ આ બન્ને જિલ્લામાં સિવિયર હીટવેવનું ઓરેન્જ એલર્ટ જ્યારે પોરબંદર, જુનાગઢ, અમરેલી, મોરબી, કચ્છ તથા વડોદરા, બનાસકાંઠા જિલ્લામાં હીટવેવની ચેતવણી અપાઈ છે. 

રાજકોટ અને સુરેન્દ્રનગર જિલ્લામાં હીટવેવ તા.૧૩ માર્ચ શુક્રવાર સુધી લંબાવાની પૂરી શક્યતા છે. આ ઉપરાંત સૌરાષ્ટ્રના દરિયાકાંઠા નજીકના સ્થળોએ પણ ઠંડકને બદલે અકળાવી દેતી ગરમીનું તથા કેટલાક જિલ્લામાં રાત્રિના પણ ઉંચુ તાપમાન રહેવાની ચેતવણી છે. 

દિવમાં ગઈકાલે વિક્રમજનક તાપમાન બાદ આજે પણ પારો સામાન્ય કરતા ૯ સે. ઉંચો રહ્યો હતો. જ્યારે રાજકોટ,અમદાવાદ સહિત રાજ્યના મોટાભાગના સ્થળોએ પણ તાપમાન ૬થી ૮ સે. ઉંચુ રહ્યું છે જે અસામાન્ય ગરમી દર્શાવે છે. 

રાજ્યમાં મહત્તમ તાપમાન વલ્લભવિદ્યાનગરમાં ૪૨.૩ અને રાજકોટમાં ૪૧.૯ સે. નોંધાયું છે. જ્યારે વડોદરા, સુરેન્દ્રનગર, અમદાવાદમાં ૪૧ સે. કરતા પણ વધુ તથા સુરત, અમરેલી, કેશોદ, વેરાવળમાં ૪૧ સે., જુનાગઢ, પોરબંદર, મહુવામાં ૪૦ સે.થી વધુ તાપમાન રહ્યું છે. 

દિવ, સુરત, વેરાવળ કરતા પણ કચ્છ જિલ્લામાં તાપમાન ઓછું!

રાજકોટ:  આશ્ચર્યજનક બાબત એ છે કે રણપ્રદેશ ધરાવતા ધરાવતા કચ્છ જિલ્લામાં આજે ચારેય કેન્દ્રો ઉપર મહત્તમ તાપમાન ૪૦ સે.થી નીચું રહ્યું છે જેમાં નલિયા ખાતે તો સવારે ૧૭ સે.એ ઠંડક અને બપોરે પણ ૩૬.૨ સે.તાપમાન નોંધાયું છે. જ્યારે દ્વારકા,ઓખામાં રાબેતામૂજબ રાજ્યનું સૌથી ઓછું મહત્તમ તાપમાન નોંધાયું છે.