ઉદગમ સ્કૂલને DEOનો ફટકો: સ્વેટર-યુનિફોર્મ માટે દબાણ કરવા બદલ ‘શો કોઝ’ નોટિસ, 10 હજારનો દંડ તોળાયો

Udgam School Show Cause Notice : અમદાવાદના થલતેજ વિસ્તારમાં આવેલી જાણીતી ઉદગમ સ્કૂલ દ્વારા વાલીઓ પર સ્વેટર અને યુનિફોર્મની ખરીદી અંગે દબાણ કરવામાં આવતું હોવાની ફરિયાદો ઉઠ્યા બાદ અમદાવાદ શહેર જિલ્લા શિક્ષણાધિકારી (DEO) એ કડક વલણ દાખવ્યું છે. ડીઈઓ કચેરીએ સ્કૂલને શો કોઝ નોટિસ ફટકારીને આરટીઈ એક્ટ મુજબ દંડનીય કાર્યવાહી કેમ ન કરવી તે અંગે ખુલાસો માંગ્યો છે.

ચોક્કસ વેન્ડર પાસેથી ખરીદીનો આગ્રહ 

વાલીઓ દ્વારા કરવામાં આવેલી ફરિયાદ મુજબ શાળા સંચાલકો દ્વારા વિદ્યાર્થીઓને ચોક્કસ બ્રાન્ડના અને નક્કી કરેલા વેન્ડર પાસેથી જ શૂઝ, યુનિફોર્મ, સ્વેટર તથા સ્પોર્ટ્સ યુનિફોર્મ ખરીદવા માટે દબાણ કરવામાં આવી રહ્યું છે. તપાસમાં એવું પણ સામે આવ્યું છે કે સ્કૂલની વેબસાઈટ પર પણ આ અંગેની વિગતો મૂકવામાં આવી છે, જે વાલીઓને પરોક્ષ રીતે ચોક્કસ જગ્યાએથી જ ખરીદી કરવા મજબૂર કરે છે.

નિયમભંગ બદલ દંડની ચીમકી 

ડીઈઓ દ્વારા ફટકારવામાં આવેલી નોટિસમાં જણાવવામાં આવ્યું છે કે શિક્ષણ વિભાગના ઠરાવ અને ડિસેમ્બર 2014ની જોગવાઈઓનો ભંગ થયો છે. RTE એક્ટ 2009ની કલમ 17 અને 19 મુજબ નિયમભંગના પ્રથમ પ્રસંગે વિદ્યાર્થીદીઠ રૂ. 10,000નો દંડ કેમ ન કરવો? તે અંગે ખુલાસો માંગવામાં આવ્યો છે.

લોગોવાળા સ્વેટરનો વિવાદ 

શિયાળાની ઋતુમાં વિદ્યાર્થીઓ અન્ય સાદું સ્વેટર પહેરીને આવે તો તેમને રોકવામાં આવતા હતા અને સ્કૂલના લોગોવાળું સ્વેટર પહેરવા માટે જ દબાણ કરવામાં આવતું હતું. આ બાબતને પણ શિક્ષણ વિભાગે ગંભીરતાથી લીધી છે.

આ સમગ્ર પ્રકરણમાં અમદાવાદ શહેર ડીઈઓ દ્વારા ઉદગમ સ્કૂલના આચાર્ય અને સંચાલકોને તાત્કાલિક ધોરણે રૂબરૂ હાજર રહીને પોતાનો ખુલાસો રજૂ કરવા આદેશ કરવામાં આવ્યો છે.