ગાંધીનગરમાં ખનિજ માફિયાઓ પર તંત્ર ત્રાટક્યું
બે દિવસમાં પ્રાંતીયા બ્રીજ, મોટી શિહોલી, જેઠીપુર રોડ, પેથાપુર, કોઠા, ધેધુ ચોકડી, રાયસણ અને અડાલજ રોડ પર ઓચિંતી તપાસ
ગાંધીનગર: ગાંધીનગર જિલ્લામાં ગેરકાયદેસર ખનિજ ખનન અને પરિવહન કરતા તત્વો સામે જિલ્લા ભૂસ્તર તંત્રએ લાલ આંખ કરી છે. ગાંધીનગર જિલ્લા ભૂસ્તર તંત્ર દ્વારા તારીખ ૧૬ અને ૧૭ ફેબુ્રઆરી દરમિયાન ખાસ ડ્રાઇવ ચલાવવામાં આવી હતી જે અંતર્ગત ૧૨ વાહનો તંત્ર એ પકડી પાડયા છે જેમાં ગેરકાયદેસર રીતે ખનીજની હેરાફેરી કરવામાં આવતી હતી. તંત્ર દ્વારા અંદાજે ત્રણ કરોડનું મુદ્દામાલ જપ્ત કરીને દંડનીય કાર્યવાહી પણ હાથ ધરવામાં આવી હતી.
જિલ્લા કલેક્ટરના સીધા માર્ગદર્શન અને સૂચના હેઠળ ખાણ-ખનિજ વિભાગ દ્વારા ઝીરો ટોલરન્સની નીતિ અપનાવી જિલ્લા ભૂસ્તર તંત્ર દ્વારા કડક કાર્યવાહી હાથ ધરવામાં આવી છે.જે અંતર્ગત મદદનીશ ભુસ્તર અધિકારી પ્રણવ સિંહ અને ખાણ-ખનિજ વિભાગની ક્ષેત્રીય તપાસ ટીમ દ્વારા જિલ્લાના સંવેદનશીલ વિસ્તારોમાં ઓચિંતી તપાસ કરવામાં આવી હતી. આ તપાસ દરમિયાન પ્રાંતીયા બ્રીજ, મોટી શિહોલી, જેઠીપુર રોડ, પેથાપુર, કોઠા, ધેધુ ચોકડી, રાયસણ અને અડાલજ જેવા વિસ્તારોને આવરી લેવામાં આવ્યા હતા. તંત્રની આ અચાનક કાર્યવાહીથી ગેરકાયદેસર પ્રવૃત્તિ કરતા તત્વોમાં ફફડાટ વ્યાપી ગયો હતો.
આ વિશેષ ડ્રાઈવ દરમિયાન બિન-અધિકૃત રીતે સાદી રેતી અને બ્લેકટ્રેપ ખનિજનું વહન કરતા કુલ ૧૨ વાહનો પકડી પાડવામાં આવ્યા છે. જેમાં ૧૦ વાહનો રોયલ્ટી પાસ વગર ખનિજની હેરાફેરી કરતા ઝડપાયા હતા. જ્યારે બે વાહનો ખનીજનું ઓવરલોડેડ વહન કરતાં તંત્રના હાથે ચડયા હતા.જપ્ત કરવામાં આવેલા વાહનોમાં ડમ્પર અને ટ્રેક્ટરનો સમાવેશ થાય છે.આ ઉપરાંત જેઠીપુર રોડ, પ્રાંતીયા બ્રીજ, મોટી શિહોલી, પેથાપુર, કોઠા, રાયસણ અને અડાલજ ખાતેથી પણ સાદી રેતીનું ગેરકાયદેસર વહન કરતા વાહનો જપ્ત કરાયા છે, જ્યારે ધેધુ ચોકડી પાસેથી બ્લેકટ્રેપ ખનિજનું ઓવરલોડ વહન કરતું ડમ્પર ઝડપાયું હતું.આગામી દિવસોમાં પણ ખાણ-ખનિજ વિભાગ દ્વારા આ પ્રકારની તપાસ તેજ કરવામાં આવશે તેવી સૂચના આપવામાં આવી છે. આ કામગીરીથી સરકારી તિજોરીને થતું નુકસાન અટકશે અને ગેરકાયદેસર પ્રવૃત્તિઓ પર લગામ આવશે.
