લાલપુર નજીક પાસે હાઇડ્રા મશીન હેઠળ ચગદાઈ જતાં પગપાળા જઈ રહેલા નાઘેડીના યુવાનનું કરૂણ મૃત્યુ

જામનગર જિલ્લાના લાલપુર તાલુકા ના કનાલુસ વિસ્તારમાં પગપાળા ચાલીને જઈ રહેલા નાઘેડીના શ્રમિક યુવાનને હાઇડ્રા મશીનના ચાલકે હડફેટમાં લઈ કચડી નાખતાં કરુણ મૃત્યુ નીપજ્યું છે.

આ બનાવની વિગત એવી છે કે જામનગર તાલુકાના નાઘેડી ગામમાં રહેતો અને ખાનગી કંપનીમાં મજૂરી કામ કરતો મયુર દોસાભાઇ નંદાણીયા નામનો 26 વર્ષનો યુવાન કે જે ગઈકાલે કાનાલુસ વિસ્તારમાંથી પગપાળા ચાલીને જઈ રહ્યો હતો, જે દરમિયાન જીજે 10-સી.ઇ. 0986 નંબરના હાઇડ્રા મશીન ના ચાલકે તેને હડફેટમાં લઈ લેતાં માથું હાઈડ્રા મશીન નીચે કચડાઈ જવાથી તેનું કરુણ મૃત્યુ નીપજયું છે.

આ બનાવ અંગે મૃતકની સાથે જ કામ કરતા મેહુલ પ્રતાપભાઈ શુક્લા એ પોલીસને જાણ કરતાં મેઘપરના એએસઆઈ વી.સી. જાડેજા બનાવના સ્થળે દોડી ગયા હતા, અને મૃતદેહ નો કબજો સંભાળ્યો છે, જ્યારે હાઇડ્રા મશીનના ચાલક જયદીપસિંહ જુવાનસિંહ પઢિયાર સામે મેઘપર પોલીસમથકમાં ગુન્હો નોંધ્યો છે.