સયાજીપુરા એપીએમસી ફૂટ માર્કેટમાં દારુનું કટીંગ કરતા ત્રણ ઝડપાયા

સયાજીપુરા એપીએમસી ફ્રૂટ માર્કેટમાં દારૂના કટીંગ વખતે કપુરાઈ પોલીસની ટીમે દરોડો પાડી દારુના જથ્થા સાથે ત્રણને પકડી પાડ્યા છે.

પ્રાપ્ત માહિતી મુજબ, ગઈકાલે રાત્રે બે વાગ્યે પ્લોટ નંબર ૨૯૯માં દારૂનું કટીંગ થઈ રહ્યું હોવાની બાતમીના આધારે પોલીસની ટીમે દરોડો પાડી ત્રણ શખ્સોને ઝડપી પાડયા હતા.

પોલીસે પૂછપરછ કરતા વિરાગ ઉર્ફે ભપ્પુ લક્ષ્મણભાઈ ચૌહાણ (રહે. ભાથુજી ફળિયું, છાણી ગામ)એ જણાવ્યું હતું કે શક્તિ ચૌહાણે તેને તથા કૌશિક યોગેશભાઈ ઝાલા (રહે. પંચમ ગ્રીન ટેનામેન્ટ, દશરથ ગામ)ને દારૂની પેટીઓ ભરવા માટે બોલાવ્યા હતા અને આ કામ બદલ રૂપિયા એક હજાર આપવાનું નક્કી થયું હતું, જ્યારે તુષાર સંતોષભાઈ શેવાળે (રહે. કંસારાવાડી, નવાપુરા) દારૂની પેટીઓ ભરવા માટે કાર લઈને આવ્યો હોવાની કબૂલાત કરી હતી.

પોલીસે રૂ. ૬.૨૪ લાખની કિંમતના ૩૧૨૦ દારુના ક્વોટર્સ, ત્રણ મોબાઈલ ફોન, એક કાર તથા એક મોપેડ સહિત કુલ રૂ. ૧૧,૬૫,૫૦૦નો મુદ્દામાલ કબજે કર્યોછે.

પોલીસે ત્રણેય આરોપીઓની પ્રોહિબિશન એક્ટ હેઠળ ધરપકડ કરી છે. જ્યારે શક્તિસિંહ ચૌહાણ તથા દારૂનો જથ્થો મોક્લનારને ફરાર જાહેર કરાયા છે.