વાઘોડિયા રોડ પર ફૂડ સ્ટોલ ચલાવતા યુવકને મારી નાંખવાની ધમકી આપી

વડોદરા,પાણીગેટના માથાભારે ડેવિડ કહારે પોલીસ ફરિયાદની અદાવત રાખી વાઘોડિયા રોડ પર ખાણીપીણીની લારી  ચલાવતા યુવકને મોડીરાતે જાનથી મારી નાંખવાની ગર્ભિત ધમકી આપી હતી. જે અંગે પાણીગેટ પોલીસે ગુનો દાખલ કરી કાયદેસરની કાર્યવાહી હાથ ધરી છે.

આજવા રોડ પંચવટી સોસાયટી  પાસે વર્ષા સોસાયટીમાં રહેતો રૃદ્ર સંજયભાઇ શાહ વાઘોડિયા રોડ  પ્રભાત ગાર્ડનની બાજુમાં ફાઇવ જી ફૂડ કોર્નર નામની ખાણીપીણીની લારી ચલાવે છે. પાણીગેટ પોલીસ સ્ટેશનમાં તેણે  ફરિયાદ નોંધાવી જણાવ્યું છે કે, ગત ૨૮ મી તારીખે સાંજે છ વાગ્યે મેં મારી લારી ખોલી રાતે ૧૧ વાગ્યા સુધી લારી ચલાવી હતી. ત્યારબાદ સાફ સફાઇ કરતો હતો. ચાર મહિના  પહેલા ડેવિડ કહારે લારી  ઉભી રાખવા માટે મારી પાસે પૈસાની માંગણી કરી મારવાની ધમકી આપી હતી. જે અંગે મેં ફરિયાદ આપી હતી. તેની અદાવત રાખી  રાતે બે વાગ્યે ડેવિડ ગટુભાઇ કહાર (રહે. પાણીગેટ) તેના મિત્ર સાથે કાર લઇને આવ્યો હતો. ડેવિડ કહાર અને તેની સાથે આવેલા તેના મિત્રે મને ગાળો બોલી ગર્ભિત ધમકી આપી હતી કે, હવે તો તું  ઘરે નહીં જઇ શકે. તને પતાવી દેવાનો છે. ત્યારબાદ તેઓ વારંવાર મારી લારી  પાસે આંટા મારતા હતા. જેથી,મેં કંટ્રોલ રૃમમાં કોલ કરતા પોલીસ આવી હતી. પોલીસ આવે તે પહેલા જ ડેવિડ અને તેનો સાગરિત ભાગી ગયા હતા.