લ્યો હવે અમદાવાદમાં સ્વચ્છ નવરાત્રિ મહોત્સવ સ્પર્ધા યોજાશે, વિજેતાને 1 લાખ સુધીના ઈનામ

Ahmedabad Navratri News : અમદાવાદને વધુ સ્વચ્છ શહેર બનાવવા હવે સ્વચ્છ નવરાત્રિ મહોત્સવ સ્પર્ધા-2025નું આયોજન મ્યુનિસિપલ કોર્પોરેશન દ્વારા કરવામા આવ્યુ છે. નવરાત્રિ પર્વ દરમિયાન સિંગલ યુઝ પ્લાસ્ટિકનો ઉપયોગ ટાળવો પડશે. કોર્પોરેશન રહેણાંક વિસ્તાર તથા સામૂહિક ગરબા એમ બે કેટેગરીમા સ્પર્ધા યોજી બંને કેટેગરીમાં ત્રણ ત્રણ વિજેતાને રોકડ પુરસ્કાર આપશે. જે એક લાખ રૂપિયા સુધી હોઇ શકે છે. 

નવરાત્રિ પર્વ દરમિયાન ગરબાના તથા આસપાસના સ્થળોને સ્વચ્છ રાખવા રહેણાંક એકમોની કેટેગરીમાં સોસાયટીઓ, ફલેટ વગેરે તથા સામૂહિક ગરબા કેટેગરીમાં પાર્ટી પ્લોટ, કોમ્યુનિટી હોલ કે ખુલ્લા પ્લોટમાં આયોજિત કરવામા આવતા ગરબાનો સમાવેશ કરાયો છે. સ્પર્ધામા ભાગ લેવા સંબંધિત વોર્ડના પબ્લિક હેલ્થ સુપરવાઈઝર મારફતે ઓનલાઈન રજિસ્ટ્રેશન કરાવીને ફોર્મ ભરાવાનુ રહેશે.

સ્પર્ધા માટે કોર્પોરેશન સાથે લાયઝન કરવા માટે એક નોડલ વ્યકિત નીમવો પડશે. રહેણાંક સોસાયટીઓ ઉપરાંત ફલેટ, હાઈરાઈઝ ટાવર, પોળ, શેરી કે ગામતળ વિસ્તારની સોસાયટીઓ સ્પર્ધામાં ભાગ લઈ શકશે. ઝીરો વેસ્ટ થીમ ઉપર ગરબા આયોજીત કરનારને મૂલ્યાંકનમાં વિશેષ પ્રાધાન્ય આપવામાં આવશે.ઝોન અને શહેર સ્તરે વિજેતા નકકી કરવા ડેપ્યુટી કમિશનરની અધ્યક્ષતામાં સમિતિ દ્વારા નિર્ણય કરવામા આવશે.

સ્પર્ધા માટે નકકી કરાયેલા માપદંડ કયા-કયા

1. ગરબાના સ્થળ(કોમન પ્લોટ)ની આસપાસ ભીના-સૂકા કચરા માટે લીલા અને વાદળી રંગના ડસ્ટબિન અવશ્ય રાખવા પડશે.ના હોય તો સબઝોન કચેરીથી મેળવી શકાશે.

2. સોસાયટીમાં એકઠો થયેલ કચરો કોર્પોરેશનના વાહનમાં નિર્ધારીત સમયે આપવો પડશે.

3. કોઈપણ સંજોગોમાં કચરો જાહેર રોડ કે ફુટપાથ ઉપર નાંખવો નહીં.

4. રિસાયકલ કરેલા મટીરીયલમાંથી બનાવેલ ડ્રેસ કોડ, ડેકોરેશનને વધારાના માર્ક મળશે.

5. જાહેર સ્થળોએ ફૂડ કોર્ટ કે ખાણી-પીણીના સ્ટોલ ઉપર ઉત્પન્ન થતા કચરાના નિકાલ માટે કોર્પોરેશનની માન્ય એજન્સી સાથે ફરજિયાત કોન્ટ્રાકટ કરવો પડશે.

6. પ્રથમ ડબામાં ફુલ, પાંદડા,નાળીયેર,દુર્વા વગેરે.બીજા ડબામાં ખેસ, ચૂંદડી અને શણગારની વસ્તુઓ તથા ત્રીજા ડબામાં સૂકો કચરો જેમ કે પડીયા,પ્રસાદના બોકસ તથા ડેકોરેશનની વસ્તુઓ સામૂહીક ગરબાના આયોજકોએ અલગ તારવવી પડશે.

વિજેતાને કેટલી રકમ અપાશે

સોસાયટી, રહેણાંક વસાહતો માટે ઝોન કક્ષાએ પ્રથમ ઈનામ રુપિયા 31 હજાર, દ્વિતીય ઈનામ રુપિયા 21 હજાર તથા તૃતીય ઈનામ રુપિયા 11 હજાર અપાશે. શહેર કક્ષાએ પ્રથમ ઈનામ રુપિયા 51 હજાર,દ્વિતીય ઈનામ રુપિયા 31 હજાર તથા તૃતીય ઈનામ રુપિયા 21 હજાર અપાશે. સામૂહિક ગરબાના આયોજકો માટે ઝોન કક્ષાએ પ્રથમ ઈનામ રુપિયા 51 હજાર, દ્વિતીય ઈનામ રુપિયા 31 હજાર તથા તૃતીય ઈનામ રુપિયા 21 હજાર અપાશે.શહેર કક્ષાએ પ્રથમ ઈનામ રુપિયા એક લાખ, દ્વિતીય ઈનામ રુપિયા 71 હજાર તથા તૃતીય ઈનામ રુપિયા 51 હજાર અપાશે.