Suspicious Death in Chhota Udepur: છોટા ઉદેપુર જિલ્લાના નાની પીપલેજ ગામ નજીક એક લાંબા સમયથી બંધ હાલતમાં પડેલી હોટલમાંથી એક વ્યક્તિનો મૃતદેહ મળી આવતા સમગ્ર પંથકમાં ચકચાર મચી ગઈ છે. મૃતકના પરિવારજનોએ આ મામલે હત્યાની આશંકા વ્યક્ત કરતા પોલીસે ઝીણવટભરી તપાસ હાથ ધરી છે.
બંધ હોટલમાંથી મળ્યો મૃતદેહ
મળતી માહિતી અનુસાર, ગઈકાલે (પહેલી મે) સાંજના સમયે છોટા ઉદેપુરના નાની પીપલેજ ગામની સીમમાં આવેલી એક બંધ હોટલમાં કોઈ અજ્ઞાત વ્યક્તિનો મૃતદેહ હોવાની જાણ થઈ હતી. આ અંગેની જાણ થતા જ પોલીસનો કાફલો ઘટના સ્થળે દોડી ગયો હતો અને તપાસ શરૂ કરી હતી. પ્રાથમિક તપાસ બાદ પોલીસે મૃતદેહનો કબજો મેળવી તેને ઓળખ અને પોસ્ટમોર્ટમ (PM)ની કાર્યવાહી માટે છોટાઉદેપુરની સિવિલ હોસ્પિટલ ખાતે ખસેડ્યો હતો.
પરિવારના ગંભીર આક્ષેપો
મૃતકની ઓળખ થયા બાદ પરિવારજનો ઘટના સ્થળે અને હોસ્પિટલ ખાતે ઉમટી પડ્યા હતા. પરિવારજનોએ ગંભીર આક્ષેપ કરતા જણાવ્યું છે કે, મૃતકને કોઈ અજાણ્યા શખસો દ્વારા ઢોર માર મારવામાં આવ્યો છે અને ત્યારબાદ તેની હત્યા કરવામાં આવી છે. પરિવારના સભ્યોએ પોલીસ સમક્ષ માંગ કરી છે કે આ મામલે નિષ્પક્ષ અને યોગ્ય તપાસ કરવામાં આવે અને જો આ હત્યા હોય તો અપરાધીઓને કડકમાં કડક સજા અપાવવામાં આવે.
છોટા ઉદેપુર પોલીસે હાલમાં અકસ્માત મોતનો ગુનો નોંધી વધુ તપાસ હાથ ધરી છે. પોલીસના જણાવ્યાનુસાર, પોસ્ટમોર્ટમ રિપોર્ટ આવ્યા બાદ જ ખબર પડશે કે મોત હાર્ટ એટેક કે અન્ય કોઈ કુદરતી કારણોસર થયું છે કે પછી પરિવારના આક્ષેપ મુજબ તેને માર મારવામાં આવ્યો છે.
