Surat Amroli Molestation Case: માનવતાને શર્મસાર કરતી વધુ એક ઘટના સુરતના અમરોલી વિસ્તારમાંથી સામે આવી છે. આલુપુરી લેવા ગયેલી એક 11 વર્ષની માસૂમ બાળકી સાથે દાદાની ઉંમરના 56 વર્ષીય આધેડે શારીરિક અડપલાં કર્યા હતા. જોકે, આજે જ્યારે પોલીસ આરોપીને તપાસ માટે ઘટના સ્થળે લાવી, ત્યારે સ્થાનિક મહિલાઓએ કાયદો હાથમાં લઈ નરાધમને બરાબરનો પાઠ ભણાવ્યો હતો.
શું હતી સમગ્ર ઘટના?
અમરોલીના સૃષ્ટિ રો-હાઉસ પાસે આવેલા સિટી હાઇટ્સ કોમ્પ્લેક્સમાં શ્રીજી લાઈવ આલુપુરી નામની દુકાન ચલાવતા દિનેશ જીવરાજભાઈ રામાણી (ઉં.વ. 56) એ પોતાની વિકૃત માનસિકતાનું પ્રદર્શન કર્યું હતું. ગતરોજ બપોરે જ્યારે બાળકી એકલી આલુપુરી લેવા ગઈ, ત્યારે આરોપીએ તારા વાળ વિખરાઈ ગયા છે, લાવ સરખા કરી આપું તેમ કહી તેને નજીક બોલાવી હતી. વાળ સરખા કરવાના બહાને આ હવસખોર આધેડે બાળકી સાથે અયોગ્ય છેડછાડ કરી હતી. જો કે અડપલાને કારણે ગભરાયેલી બાળકી ત્યાંથી ભાગી છૂટી અને ઘરે જઈ માતા-પિતાને આપવીતી જણાવી. પરિવારે તુરંત અમરોલી પોલીસ મથકે ફરિયાદ નોંધાવી હતી. પોલીસે પણ તુરંત કાર્યવાહી કરીને તેને ઝડપી લીધો હતો.
આ પણ વાંચો: સુધરી જાવ... હવે હું મિસ્ટર NICE નહીં બનું: પરમાણુ હથિયારો મુદ્દે ટ્રમ્પની ઈરાનને ચેતવણી
પોલીસ કાર્યવાહી અને રિ-કન્સ્ટ્રક્શન
અમરોલી પોલીસે ગંભીરતા દાખવી આરોપી દિનેશ રામાણી વિરુદ્ધ છેડતી અને પોક્સો (POCSO) એક્ટ હેઠળ ગુનો નોંધી તેની ધરપકડ કરી લીધી હતી. આજે જ્યારે પોલીસ આરોપીને લઈને ઘટનાનું રિ-કન્સ્ટ્રક્શન કરવા માટે દુકાને પહોંચી, ત્યારે ત્યાં લોકોનું ટોળું ઉમટી પડ્યું હતું. પોતાની દીકરીઓની સુરક્ષાને લઈને ચિંતિત મહિલાઓનો ગુસ્સો સાતમા આસમાને પહોંચ્યો હતો.
મહિલાઓએ કર્યો ટપલીદાવ
પોલીસની હાજરી હોવા છતાં, ઉશ્કેરાયેલી મહિલાઓએ આરોપીને લાતો મારી હતી અને એક મહિલાએ તો પોતાના શૂઝ કાઢીને નરાધમને ફટકાર્યો હતો. સ્થાનિકોમાં ચર્ચા છે કે આ શખ્સે અગાઉ પણ આવી હરકતો કરી હોઈ શકે છે.
આરોપી: દિનેશ જીવરાજભાઈ રામાણી (મૂળ રહે. જૂનાગઢ).
ગુનો: 11 વર્ષની બાળકીની છેડતી (POCSO હેઠળ ધરપકડ).
સ્થળ: શ્રીજી લાઈવ આલુપુરી, અમરોલી, સુરત.
