પાંચ સર્જરી અને 38 દિવસ હોસ્પિટલમાં રહ્યા પછી પણ બોર્ડ પરીક્ષા આપશે

વડોદરાઃ અભ્યાસ પ્રત્યેનો લગાવ અને  ઝનૂન હોય તો ગમે તેવું વિઘ્ન નડતરરુપ બની શકતું નથી.શહેરના ભાયલી વિસ્તારમાં રહેતા દીપ પટેલે આ વાતને સાચી પૂરવાર કરી બતાવી છે.

પરીક્ષાના બે મહિના પહેલા દીપ તેના ભાઈ સાથે ટુ વ્હીલર પર  બેસીને ટયુશનથી પરત આવી રહ્યો હતો ત્યારે ભાયલી વિસ્તારમાં જ રસ્તા પરના ખાડાના કારણે ટુ વ્હીલર સ્લીપ થયું હતું.જેના કારણે તે રસ્તા પર પડયો હતો.દીપના એક પગ પર પાછળથી આવતા ડમ્પરના પૈડા ફરી વળ્યા હતા.

દીપના માતા પન્નાબેન કહે છે કે, ટુ વ્હીલર સ્લીપ થયું ત્યારે પાછળથી આવતા ડમ્પરચાલકે બ્રેક પણ મારી હતી.જોકે પગમાં ગંભીર ઈજાઓ હોવાથી અમે દીપને હોસ્પિટલ લઈ ગયા હતા.જ્યાં તેના પગ પર પહેલા ચાર અને એ પછી એક એમ પાંચ સર્જરી કરવી  પડી હતી.તેને કુલ ૩૮ દિવસ હોસ્પિટલમાં રહેવું પડયું હતું. હજી પણ તે પથારીવશ છે.પગ સાજો થતા વાર લાગશે.જોકે પરીક્ષા આપવાનો તેનો નિર્ધાર મક્કમ છે.

દીપે ઘરે આવીને પણ પરીક્ષા માટે તૈયારી કરવાનું શરુ કર્યું હતું.તે કહે છે કે, મને પગમાં દુખાવો થાય છે.ગોળીઓ લેવી પડે  છે.મારે આખો દિવસ બેડ પર જ રહેવું પડે છે અને બેડ પર જ વાંચું છું.મેં આખુ વર્ષ તૈયારીઓ કરી છે એટલે હું ડ્રોપ લેવા નથી માગતો અને ગમે તે ભોગે મારે પરીક્ષા આપવી છે.મારા પિતા ફૂડ એક્સપોર્ટ કંપનીમાં નોકરી કરે છે અને મારે ભવિષ્યમાં હોટલ મેનેજમેન્ટનો અભ્યાસ કરવો છે.

ગ્રાઉન્ડ ફ્લોર પર બેઠક વ્યવસ્થા ગોઠવાઈ 

દીપ પટેલના માતા પિતાએ આપેલી અરજીના આધારે તેના માટે ગ્રાઉન્ડ ફ્લોર પરના ક્લાસરુમમાં બેઠક વ્યવસ્થા ગોઠવવામાં આવી છે.દીપ પટેલ પાદરાની સ્કૂલમાં પરીક્ષા આપશે.પહેલા તેનો બેઠક નંબર પહેલા માળ પર હતો પણ હવે તેમાં બદલાવ કરવામાં આવ્યો છે.