- 2 રવિવારે ભાવનગર અને 2 સોમવારે બીકાનેરથી ટ્રેન પ્રસ્થાન કરશે
- બન્ને દિશામાં 18 સ્ટેશન પર ટ્રેન ઉભી રહેશે, આજથી ટિકિટ બુકિંગ શરૂ થશે
યાત્રિઓની સુવિધા અને મુસાફરોની વધારાની ભીડને ધ્યાનમાં રાખી પશ્ચિમ રેલવે દ્વારા ભાવનગર ટર્મિનસ અને બીકાનેર વચ્ચે વિશેષ ભાડા પર સાપ્તાહિક સુપરફાસ્ટ સ્પેશિયલ ટ્રેન ચલાવવાનો નિર્ણય કરાયો છે. આ વિશેષ ટ્રેન તા.૨૨-૨થી તા.૨૯-૩ સુધી દર રવિવારે સવારે ૪-૨૫ કલાકે ભાવનગર ટર્મિનસથી ઉપડી બીજા દિવસે મધરાત્રે ૧-૧૫ કલાકે બીકાનેર પહોંચશે. તેમજ તા.૨૩-૨થી તા.૩૦-૩ સુધી દર સોમવારે સવારે ૯ કલાકે બીકાનેરથી પ્રસ્થાન થઈ બીજા દિવસે વહેલી સવારે ૪-૩૫ કલાકે ભાવનગર ટર્મિનસ પહોંચશે. આ ટ્રેન બન્ને દિશામાં સિહોર, ધોળા, બોટાદ, સુરેન્દ્રનગર ગેટ, આમ્બલી રોડ, ગાંધીનગર કેપિટલ, મહેસાણા (જં), પાલનપુર (જં), આબુરોડ, ફાલના, મારવાડ (જં), પાલી મારવાડ, લૂણી (જં), જોધપુર (જં), ગોટન, મેડતા રોડ (જં), નાગૌર અને નોખા સ્ટેશન પર હોલ્ટ કરશે. ટ્રેનમાં સેકન્ડ એસી, થર્ડ એસી, સ્લીપર ક્લાસ અને જનરલ સેકન્ડ ક્લાસના કોચ લાગેલા રહેશે તેમ ભાવનગર રેલવેના વરિષ્ઠ મંડળ વાણિજ્ય પ્રબંધકે જણાવ્યું છે.
