સાઇબર ગઠિયાઓનો વધતો જતો ત્રાસ
વોટ્સએપ ગુ્રપમા એડ કરી નફાની લાલચ આપીને એપ્લિકેશન ડાઉનલોડ કરાવી રૂપિયા પડાવ્યાં
સમગ્ર દેશમાં હાલ સાયબર ક્રાઇમની ઘટનાઓમાં સતત વધારો થઈ રહ્યો છે ત્યારે શિક્ષિત વ્યક્તિઓ પણ આ સાઇબર ગઠિયાઓની જાળમાં ફસાઈ રહ્યા છે. આ વખતે ગાંધીનગર શહેર નજીક ખોરજ ખાતે આવેલી અદાણી શાંતીગ્રામ વસાહતમાં રહેતા અને અહીં કામ કરતા યુવાન સાયબર ગઠિયાઓની છેતરપિંડીનો ભોગ બન્યા છે. મૂળ આંધ્રપ્રદેશના રાજેશ સીરીગીરીસેટ્ટી દ્વારા ફરિયાદ નોંધાવવામાં આવી હતી કે ગત ૨૮ જાન્યુઆરીના રોજ તેમના મોબાઈલ નંબરને એક વોટ્સએપ ગુ્રપમાં એડ કરવામાં આવ્યો હતો. જ્યાં આ ગુ્રપમાં વિકાસ શર્મા અને એકાઉન્ટ મેનેજર માઈકલ કુલીન્સ નામના વ્યક્તિઓએ શેરબજારમાં રોકાણ કરવા માટે અને મોટો નફો મળવાની લાલચ આપવામાં આવી હતી. જેથી તેમને એક એપ્લિકેશન પણ ડાઉનલોડ કરાવડાવવામાં આવી હતી ત્યારબાદ તેમણે ૨૫ ફેબુ્રઆરીથી ૧૩ માર્ચ દરમિયાન અલગ-અલગ બેંક ખાતાઓમાંથી ૧.૬૮ કરોડ રૂપિયા ભરી દીધા હતા.
જોકે તેમણે રૂપિયા ઉપાડવાનો પ્રયાસ કર્યો હતો પરંતુ તે થઈ શક્યા ન હતા અને આઇપીઓ ખરીદવાના બહાને તેમની પાસે વધુ ૧.૪૮ કરોડ રૂપિયાની માંગણી કરવામાં આવી હતી. જેથી તેમણે આ સંદર્ભે તેમની પત્નીને વાત કરી હતી અને તેમની સાથે સાયબર ફ્રોડ થયું હોવાનું લાગતા સાયબર હેલ્પલાઇનમાં ફરિયાદ કરી હતી. ત્યારબાદ આ અંગે હાલ ગાંધીનગર રેન્જ સાયબર ક્રાઇમ પોલીસ દ્વારા ગુનો દાખલ કરીને તપાસ શરૂ કરવામાં આવી છે.
