સગીરના ગળામાં છરી મારતા લોહી લુહાણ હાલતમાં સારવાર હેઠળ

અમદાવાદ, બુધવાર

નારોલમાં મિત્ર સાથે મસ્તી કરવાનો કરુણ અંજામ આવ્યો હોવાનો કિસ્સો પ્રકાશમાં આવ્યો છે જેમાં તકરારના બીજા દિવસે સગીર કંઇ ખબર વગર આરોપીએ આવીને પાછળથી ગળામાં છરી મારીને લોહી લુહાણ કર્યો હતો. જેને લઇને સગીર ગંભીર હાલતમાં સિવિલ હોસ્પિટલમાં સારવાર હેઠળ છે. આ બનાવ અંગે નારોલ પોલીસે આરોપી સામે હત્યાની કોશિષનો ગુનો નોંધી વધુ તપાસ હાથ ધરી છે.

અદાવતમાં બીજા દિવસે સગીર ઉપર છરીથી જીવલેણ હુમલો ઃ પોલીસે હત્યાની કોશિષ નો ગુનો નોંધ્યો

નારોલ વિસ્તારમાં વટવા કેનાલ પાસે  વિધવા મહિલાએ વટવા રહેતા જુનેદ નામંના શખ્સ સામે ફરિયાદ નોંધાવી છે કે તેમનો ૧૭ વર્ષના પુત્રને ગઇકાલે સવારે આરોપીએ વટવા કેનાલ પાસે ખ્વાજાનગર પાસે આરોપીએ પાછળથી આવીને ગળાના પાછળના ભાગે છરી મારીને હુમલો કર્યો હતો જેના કારણે લોહી લુહાણ હાલતમાં સગીરને પ્રથમ એલ.જી. હોસ્પિટલ બાદ વધુ સારવાર માટે સિવિલ હોસ્પિટલમાં દાખલ કરાયો હતો.

ભોગ બનનારા સગીરના જણાવ્યા મુજબ બનાવની આગલી રાત આરોપી અને તે તેના મિત્રો સાથે પાનના ગલ્લે બેઠા હતા આ સમયે આરોપી સાથે મસ્તી કરતા તકરાર થઇ હતી જેની અદાવતમાં આરોપીએ તેના ઉપર ખૂની હુમલો કર્યો હતો.