વિદ્યાર્થીઓના સ્કૂલ યુનિફોર્મના પેમેન્ટ પેટે આપેલા 4.65 લાખના ચેક રીટર્ન કેસમાં સ્કૂલ સંચાલકને 6 માસની કેદ

- આરોપીની ગુનાઈત માનસિકતા જણાતી માત્ર બાળબચ્ચાવાળા હોવાના કારણથી હળવી સજા કે દંડ કરવો ન્યાયોચિત નથી :કોર્ટ

(પ્રતિનિધિ દ્વારા) સુરત, શુક્રવાર

આજથી ચાર વર્ષ પહેલાં વિદ્યાર્થીઓ ના સ્કુલ યુનિફોર્મ ની ઉધાર ખરીદીના પાર્ટ પેમેન્ટ પેટે આપેલાં રૂ.4.65 લાખના ચેક રીટર્ન કેસમાં આરોપી સ્કુલ સંચાલકને આજે એડીશ્નલ ચીફ જ્યુડીશ્યલ મેજીસ્ટ્રેટ સંજયકુમાર સી.મકવાણા એ દોષી ઠેરવી છ માસની કેદ, ફરીયાદી ને ચેકની રકમ ત્રીસ દિવસમાં વળતર તરીકે ચૂકવવા હુકમ કર્યો હતો.જો આરોપી વળતર ન ચૂકવે તો વધુ્ બે મહીનાની કેદની સજા અલગ અલગ ભોગવવા હુકમ કર્યો છે.

પુણાગામ માં નારાયણ નગર સોસાયટીમાં રહેતા તથા સ્કૂલ યુનિફોર્મના વેચાણ કરતાં સિંઘલ ટ્રેડર્સના ફરિયાદી સંચાલક રાજેશ જગદીશ પ્રસાદ સિંઘલે એપ્રિલ-મે 2017 દરમિયાન કુલ રૂ.11.48 લાખની કિંમતના યુનિફોર્મ કડોદરા રોડ સ્થિતિ વરેલી ગામની શ્રી સદ્દગુરુ શિક્ષા નિકેતન વિદ્યાલયના આરોપી ટ્રસ્ટી મનોજકુમાર રામાશ્રય શર્મા(રે. બાલાજી ગ્રીનસીટી, કડોદરા બારડોલી રોડ)ને ઉધાર વેચાણ આપ્યા હતાં. જે પૈકી આરોપી સંચાલકે ચૂકવણી પેટે રૂ.6.83 લાખ રોકડા બાકી લેણા પેટે 4.65લાખના બે ચેક લખી આપ્યા હતા.જે ચેકને ફરિયાદી એ બેકમા વટાવવા નાખતાં આરોપીના ખાતામાં અપુરતા ભંડોળના શેરા સાથે પરત ફર્યા હતાં.

જેથી ફરિયાદી રાજેશ સિંઘલે એડવોકેટ મિનેશ ધનસુખ ભાઈ ઝવેરી મારફતે આપેલી નોટીસનો અમલ ન કરતાં ચેક રીટર્ન અંગે કોર્ટ ફરિયાદ નોંધાવી હતી.

આજે આ કેસની અંતિમ સુનાવણી હાથ ધરવામાં આવતાં કોર્ટે રેકર્ડ પરના પુરાવા અને ફરિયાદ પક્ષે પોતાનું કાયદેસરનું લેણું યોગ્ય પુરાવાથી પુરવાર કર્યુ હોવાનો નિર્દેશ આપ્યો હતો.આરોપીએ તેમના વિરુદ્ધના કાનુની અનુમાનોનુ ખંડન કરવામાં નિષ્ફળ જતાં આરોપીને દોષી ઠેરવ્યો હતો.આરોપીએ પોતે બાળ બચ્ચાવાળા હોઈ સજામાં રહેમ રાખવાની માંગને કોર્ટે નકારી જણાવ્યું હતું કે માત્ર બાળ બચ્ચાવાળા માણસ હોવાના કારણથી આરોપીને હળવી સજા અને દંડ ન કરી શકાય.ઉપરોક્ત કેદ તથા દંડની સજા ફટકારતો હુકમ કર્યો હતો.