પેમેન્ટનો બનાવટી સ્ક્રીન શોટ મોકલીને છેતરપિંડી કરતો ગઠિયો અંતે ઝડપાયો

અમદાવાદ,રવિવાર

અમદાવાદ તેમજ અન્ય શહેરોમાં વેપારીઓ પાસેથી ઇલેક્ટ્રોનીક્સ ગેટેઝ્સ અને કપડા સહિતનો માલ વેપારી પાસેેથી ખરીદીને પેમેન્ટ કર્યાનો બનાવટી સ્ક્રીન શોટ મોકલીને ૫૦થી વધુ વેપારીઓ છેતરપિંડી કરનાર ગઠિયાને સરખેજ પોલીસે ઝડપી લીધો હતો.  બોપલ આંબલી રોડ પર કાપડની દુકાન ધરાવતા વેપારીને બનાવટી સ્ક્રીન શોટ મોકલીને છેતરપિંડી કરતા સમગ્ર મામલો સામે આવ્યો હતો.

બોપલમાં રહેતા મયુરભાઇ દોંગા બોપલ આંબલી રોડ પર પડદાના કાપડની શોપ ધરાવે છે.  એક સપ્તાહ પહેલા એક યુવક આવ્યો હતો અને તેણે તાત્કાલિક  કાપડ લેવાનું કહીને ૪૦ હજારનું કાપડ પસંદ કર્યું હતું. જેમાં તેણે બેંકની ડીટેઇલ મોકલીને કાપડ લઇને  પેમેન્ટ કર્યાનો સ્ક્રીન શોટ મોકલ્યો હતો. પરંતુ, મયુરભાઇના બેંક એકાઉન્ટમાં નાણાં જમા થયા નહોતા. બીજી તરફ  યુવકનો મોબાઇલ સ્વીચ ઓફ આવતો હતો.

આ યુવકે તેનું નામ ઋષિલ શાહ જણાવ્યું હતું.  જેની ભાળ ન મળતા મયુરભાઇએ સરખેજ પોલીસનો સંપર્ક કર્યો હતો. જેમાં સીસીટીવી ફુટેજના આધારે પોલીસે તપાસ શરૂ કરી હતી. આ દરમિયાન પોલીસ ઇન્સ્પેક્ટર એલ એલ ચાવડાને  ઋષિલ શાહ અંગે કડી મળી હતી અને તેને ઘાટલોડિયામાં આવેલા રત્નદીપ ટાવર સ્થિત મકાનમાંથી ઝડપી લીધો હતો. પોલીસે  તેની પાસેથી  કાપડનો જથ્થો ઉપરાંત, અલગ અલગ કંપની લાઇટ, પંખા, ટાયર, આઇફોન સહિત ૧૦ લાખનો મુદ્દામાલ જપ્ત કર્યો છે.પોલીસને જાણવા મળ્યું હતું કે  તેના વિરૂદ્ધ ગાંધીનગર અને અમદાવાદમાં  અકસ્માત સહિત કુલ આઠ ગુના નોંધાઇ ચુક્યા છે. સુત્રોના જણાવ્યા મુજબ  તે કારમાં બનાવટી નંબર પ્લેટ રાખતો હતો અને અન્ય નામના સીમ કાર્ડ પણ વાપરતો હતો.  પોલીસે આ અંગે પણ તપાસ શરૂ કરી છે.