વડોદરા શહેરના રસ્તાઓ પરના ખાડાઓની દુરસ્તી પાછળ રૂ.1.70 કરોડનો ખર્ચ થયો

Vadodara Corporation : વડોદરા પાલિકાના ચારેય ઝોનના રસ્તાઓ ઉપરના ખાડાઓની દુરસ્તી કોલ્ડમીક્ષ Injection pothole patching machineથી જી.પી.એમ.સી. એક્ટની કલમ 67/3/સી હેઠળ ઈજારદાર રચના કન્સ્ટ્રકશન એન્ડ ઇન્ફ્રાસ્ટ્રકચર પાસેથી કરાવેલ કામગીરીના થયેલ ખર્ચ રૂ.1,69,18,559 (GST સહ)ની રકમ અંગે સ્થાયી સમિતિમાં જાણ કરવામાં આવી છે.

પાલિકાના ચારેય ઝોનના DLP સિવાયના મુખ્ય તેમજ આંતરીક રસ્તાઓ ઉપર ચાલુ ચોમાસાની ઋતુ દરમ્યાન ખાડાઓ (Potholes) પડેલા હતા. જેની દુરસ્તી માટે ખાતાના હોટમીક્ષ પ્લાન્ટથી તેમજ ચારેય ઝોનના કાર્પેટ કામના મંજુર ARCના ઈજારદારોના પ્લાન્ટ ઉપરથી પણ મીક્ષમાલ લઈ પેચવર્કની કામગીરી કરવાનું આયોજન કરેલ હતું. પરંતુ ઇજારદારોના ડામર પ્લાન્ટ ચાલુ વરસાદ તેમજ અગવડભર્યા લોકેશન હોવાના કારણે બંધ હતા. જેથી પેચવર્કની વધુ કામગીરી થઈ શક્તી ન હોવાના સંજોગો ઉભા થયેલ હતા. અમદાવાદ અને સુરત મહાનગર પાલિકામાં ખાડાઓના પેચવર્ક માટે કોલ્ડમીક્ષ Injection pothole patching machineથી કામગીરી કરાવવામાં આવે છે. શહેરના રસ્તાઓ ઉપર પડેલા ખાડાઓનું પેચવર્ક / રીસરફેસીંગની કામગીરી યુધ્ધના ધોરણે પૂર્ણ કરાવવા જે તે સમયે સરકારની સુચના અન્વયે કામગીરી તાત્કાલિક હાથ ધરવાની હોવાથી જી.પી.એમ.સી. એક્ટની કલમ 67/3/સી હેઠળ કામગીરી કરવા સૈદ્ધાંતિક મંજુરી આપીને ઈજારદાર રચના કન્સ્ટ્રકશન એન્ડ ઇન્ફ્રાસ્ટ્રકચરને વર્કઓર્ડર આપી સ્થળે કામગીરી શરૂ કરાવેલ હતી. કામગીરી કરાવવા અમદાવાદ અને સુરત મહાનગર પાલિકામાં આ પ્રકારની કામગીરી કરતી એજન્સીઓ પાસેથી ઓફર મેળવવામાં આવેલ હતી. જે પૈકી રચના કન્સ્ટ્રકશન એન્ડ ઈન્ફ્રાસ્ટ્રકચર દ્વારા કામગીરી માટે ભરેલા ભાવ રૂ.1240 પ્રતિ ચો.મી.માં નેગોશિએશન કરી સુરત મહાનગર પાલિકાના મંજુર ભાવ રૂ.1050 પ્રતિ ચોમી+ GSTથી કામગીરી કરવા સંમતિ આપેલ હતી. જે મુજબ ઈજારદારને વર્કઓર્ડર આપવામાં આવેલ હતો. ચારેય ઝોનમાં કામગીરી પૂર્ણ કરાવવામાં આવેલ હતી. જેમાં પૂર્વ ઝોનમાં રૂ.19,81,706 પશ્ચિમ ઝોનમાં રૂ.61,99,525 ઉત્તર ઝોનમાં રૂ.64,98,406 અને દક્ષિણ ઝોનમાં રૂ.22,38,922 મળી કુલ રૂ.1,69,18,559નો ખર્ચ થયો હતો. જેની જાણ સ્થાયી સમિતિમાં કરવામાં આવી છે.