વડોદરાના આજવા રોડની ચંચળબા પાર્ક સોસાયટીમાં પાણીની તંગી વચ્ચે અન્ય સોસાયટીને પાણીની લાઈન આપવાની પેરવી થતા રહીશોમાં આક્રોશ

Vadodara Corporation : વડોદરાના આજવા રોડ પર રઘુકુળ વિદ્યાલયની પાછળ આવેલી ચંચળબા પાર્ક સોસાયટીમાં છેલ્લા એક વર્ષથી પીવાના પાણીના પ્રશ્ને રહીશો પરેશાન છે તેવામાં તેઓની સોસાયટીની પાણીની લાઇનમાંથી અન્ય સોસાયટીને પાણી આપવાની પેરવી થતા સ્થાનિકોએ તંત્ર સામે નારાજગી દર્શાવી બિલ્ડર અને કોર્પોરેશનના અધિકારીઓ વચ્ચે સાંઠગાંઠના આક્ષેપ કર્યા હતા.

ચંચળબા પાર્ક સોસાયટીમાં ઘણા સમયથી પાણીની સમસ્યા છે. રહીશોએ અનેક વખત કોર્પોરેશનને રજૂઆતો કરી છે. દરમ્યાન સોસાયટી પાસે સિદ્ધાર્થ બંગલોઝ નામની નવી સાઇટ બની હોય સોસાયટીમા પાણીનું પ્રેશર ચેક કરવા માટે ખાડા ખોદી સિદ્ધાર્થ બંગલોઝને પાણીની લાઈન આપવાની કામગીરી થતા આજરોજ રહીશોએ એકત્ર થઈ કોર્પોરેશન સામે બળાપો કાઢ્યો હતો. લોકોએ આક્ષેપ કર્યા હતા કે, કોર્પોરેશનના અધિકારીઓ અમારી સાથે યોગ્ય વર્તન કરી રહ્યા નથી. અગાઉથી અમારી જ સોસાયટીમાં પાણીની તકલીફ છે, પૂરતા પ્રમાણમાં પાણી મળી રહ્યું નથી. તો અમે ક્યાંથી તેઓને લાઈન આપીએ, અન્ય સ્થળેથી કોર્પોરેશન સિદ્ધાર્થ બંગલોઝને નવી પાણીની લાઈન નાખી આપે.