વડીયાના બરવાળા બાવીસી ગામનો કમકમાટીજનક કિસ્સો : બેફામપણે ટ્રેક્ટર હાંકતો હોવાથી ટપાર્યો તો રસ્તામાં આંતરી પાઈપ અને પથ્થરના ઘા ઝીંકી મોતને ઘાટ ઉતારી નાસી છૂટયા બાદ પકડાયો
અમરેલી, : વડિયા તાલુકાના બરવાળા બાવીસી ગામે છેલ્લા ત્રણ વર્ષથી વાડી ખેતરમાં ભાગિયા તરીકે કામ કરતા મધ્યપ્રદેશના વતની રિલ્સ બનાવવાના ચકકરમાં બેફામ રીતે ટ્રેકટર ચલાવતો હોવાનું વાડી માલિકના પુત્રને ધ્યાનમાં આવતા એેણે ઠપકો આપતા આ શ્રમિકે વાડી માલિકના પુત્રને રસ્તામાં આંતરી પાઈપ અને પથ્થરના ઘા મારી મોતને ઘાટ ઉતારી દીધા બાદ નાસી ગયો હતો. જેને પોલીસે કુંકાવાવ તાલુકાના કોલડા ગામના રસ્તેથી બાઈક સાથે પકડી પાડી કાર્યવાહી કરી છે.
બનાવની વધુ વિગત મુજબ બરવાળા બાવીસી ગામે કર્ણદેવભાઈ અશોકભાઈ વાળા રાતના સમયે તેની વાડીએ ગયા હતા એ વખતે તેની વાડી ખેતરમાં ભાગિયું રાખી છેલ્લા ત્રણ વર્ષથી ખેતીકામ કરતા મધ્યપ્રદેશનો વતની રવિ જેમાભાઈ કરોલિયા ખેતરમાં રિલ્સ બનાવવાના ચકકરમાં આડેધડ ટ્રેકટર ચલાવતો હતો. આ જોતા જ કર્ણદેવભાઈએ ઠપકો આપતા રવિ સમસમી ગયો હતો.
એ વખતે કર્ણદેવભાઈ બાઈક લઈને ઘર તરફ જવા નીકળતા રસ્તામાં રવિએ આંતરી કર્ણદેવભાઈ ના માથામાં પાઈપ ફટકારી પછાડી દીધા હતા . બાદમાં મોઢા અને માથામાં પથ્થરના ઘા મારી બે રહેમ રીતે ઈજા કરી બાઈક લૂંટીને રવિ નાસી ગયો હતો. ઘટના બાદ ઈજાગ્રસ્ત કર્ણેદેવને સારવારમાં ખસેડયો હતો પણ તેણે દમ તોડી દીધો હતો અમરેલી એલસીબીએ તપાસનો ધમધમાટ કરી લૂંટેલા બાઈક સાથે ભાગિયા શ્રમિક આરોપી રવિ કરોલીયાને કુંકાવાવ નજીકના કોલડા ગામના રસ્તા પરથી બાઈક સાથે પકડી પાડયો હતો.
