લાલ મરચામાં લાલચોળ તેજી, ભાવ ગત વર્ષથી બમણાં થયા, ઓછી ઉપજ થયાનો અંદાજ

Red Chilli Price Hike 2026: વર્ષ 2024માં દેશમાં અંદાજે 29 લાખ ટન લાલ મરચાનું ઉત્પાદન થયું છે, જેમાં ગુજરાતનો હિસ્સો 27 હજાર ટન રહ્યો છે. ગુજરાતમાં ગોંડલ સહિતના સ્થાનિક મરચાં તેની આગવી તીખાશ અને સ્વાદ માટે જાણીતા છે, પરંતુ આ વર્ષે સીઝન બરાબર જામી તે પહેલા જ સૂકા મરચાંના ભાવમાં જોરદાર તેજી જોવા મળી રહી છે. ગત વર્ષની સરખામણીએ મરચાંના ભાવમાં બમણાથી પણ વધુનો વધારો થયો છે.

વર્ષ દરમિયાન ભાવમાં ધરખમ ઉછાળો

માર્કેટિંગ યાર્ડના સૂત્રોના જણાવ્યા અનુસાર, ફેબ્રુઆરી-2025માં સૂકા મરચાંના પ્રતિ 20 કિલોના જથ્થાબંધ ભાવ ₹800થી ₹2300ની રેન્જમાં હતા. આ ભાવ સતત વધતા રહીને એક મહિના પહેલા ₹2600થી ₹4400 સુધી પહોંચ્યા હતા. જોકે, માત્ર છેલ્લા એક મહિનામાં જ ભાવમાં તોતિંગ ઉછાળો આવ્યો છે અને આજે 10 ફેબ્રુઆરી, 2026ના રોજ મરચાના ભાવ ₹3700થી વધીને ₹6450ની સપાટીએ પહોંચી ગયા છે.

સીઝન પૂર્વે જ લાલ મરચામાં તોતિંગ ભાવ વધારો

લાલ મરચાના ભાવમાં માત્ર એક જ માસમાં પ્રતિ 20 કિલોએ આશરે ₹1100થી ₹2000નો જંગી ઉછાળો નોંધાયો છે. આ વધારાને કારણે છૂટક બજારમાં સારી ગુણવત્તાના મરચામાં પ્રતિ કિલોએ ₹50થી ₹100 સુધીનો ભાવવધારો જોવા મળ્યો છે. ઉલ્લેખનીય છે કે, દેશમાં આંધ્રપ્રદેશ આશરે 10 લાખ ટન સાથે મરચાનું સૌથી વધુ ઉત્પાદન કરતું રાજ્ય છે, પરંતુ આ વર્ષે પ્રતિકૂળ હવામાન, ક્લાયમેટ ચેન્જ અને કમોસમી વરસાદને કારણે મરચાંના પાકને વ્યાપક નુકસાન થયું હોવાનું સૂત્રો જણાવી રહ્યા છે.

આ પણ વાંચો: ગુજરાત AAPમાં મોટું ભંગાણ, નારાજ ખેડૂત નેતા રાજુ કરપડાએ રાજીનામું ધર્યું, ભાજપમાં જોડાશે?

માર્ચ મહિના પહેલા જ ભાવ આસમાને પહોંચ્યા

સામાન્ય રીતે સૌરાષ્ટ્ર સહિત સમગ્ર રાજ્યમાં ધુળેટી પછી લાલ મરચાના પાવડરની ખરીદીની સીઝન શરુ થતી હોય છે અને ગૃહિણીઓ આખા વર્ષના મસાલાની ખરીદી કરતી હોય છે. માર્ચ મહિનામાં મસાલા બજાર ધમધમતી થાય છે, પરંતુ આ વર્ષે સીઝન વિધિવત રીતે શરુ થાય તે પહેલા જ ભાવ આસમાને પહોંચતા સામાન્ય જનતાના રસોડાના બજેટ પર અસર પડવાની ભીતિ સેવાઈ રહી છે.