રાજ્ય બહારથી ઇંગ્લિશ દારૂના માતબર જથ્થાને ભાણવડ પંથકમાં ઘુસાડવા માટેનું નેટવર્ક રાજકોટ આરઆર સેલની ટીમે પકડી પાડ્યું : સફળ દરોડો

Jamnagar : આગામી સ્થાનિક સ્વરાજ્યની ચૂંટણીઓને ધ્યાનમાં રાખીને રાજકોટ રેન્જ પોલીસ દ્વારા ગેરકાયદેસર પ્રવૃત્તિઓ સામે કડક કાર્યવાહી હાથ ધરવામાં આવી રહી છે. તે અંતર્ગત રાજકોટ રેન્જ ટીમે મોટી સફળતા હાંસલ કરી છે.

નાયબ પોલીસ મહાનિરીક્ષક નિર્લિપ્ત રાયના માર્ગદર્શન હેઠળ રાજકોટ રેન્જ પોલીસ દ્વારા કાર્યવાહી કરતાં કપાસીયાની બોરીની આડમાં સંતાડી લઈ જવાતો ઇંગ્લિશ દારૂનો મોટો જથ્થો ઝડપી પાડવામાં આવ્યો છે. મળેલી બાતમીના આધારે રાજકોટ-ચોટીલા હાઈવે પર જાનીવડલા ગામના પાટીયા પાસે ટાટા કંપનીનો ટ્રક (રજી. નં. જી.જે. 10 ટી.ટી. 6183) અટકાવી તપાસ કરતાં કપાસીયાની બોરીની આડમાં છુપાવવામાં આવેલ અંકલ ટોમ કંપનીની 750 એમ.એલ.ની દારૂની બોટલો કુલ નંગ 10,740 મળી આવી હતી, જેની કિંમત અંદાજે 1,28,88,000 ગણાય છે.પોલીસે ટ્રક સાથે દારૂ, મોબાઇલ ફોન, કપાસીયાની બોરી, તાલપત્રી તેમજ રોકડ રકમ મળી કુલ 1,46,59,300 નો મુદ્દામાલ કબજે કર્યો હતો.

આ મામલે ટ્રકના ડ્રાઈવર સાહિદ જુસબભાઈ ઇશાભાઈ હિંગોરા (રહે. ભાણવડ, જી. દેવભૂમિ દ્વારકા)ને ઝડપીને ચોટીલા પોલીસ સ્ટેશન ખાતે ગુન્હો દાખલ કરવામાં આવ્યો છે.પુછપરછ દરમ્યાન બહાર આવ્યું છે કે આ દારૂનો જથ્થો રાણપર, ભાણવડના ચનાભાઈ દેવાભાઈ રબારી દ્વારા મોકલવામાં આવ્યો હતો. પોલીસ દ્વારા સંડોવાયેલા અન્ય આરોપીઓ સામે પણ કાયદેસરની કાર્યવાહી હાથ ધરવામાં આવી રહી છે. આ સમગ્ર કામગીરી પોલીસ ઇન્સ્પેક્ટરના માર્ગદર્શન હેઠળ સહિતની ટીમ દ્વારા સફળતાપૂર્વક પાર પાડવામાં આવી હતી.