ઉમરગામના સંજાણના 22 વર્ષીય યુવાનની ભારતીય સેનામાં પસંદગી થઈ

Vapi News : અભ્યાસની સાથે એનસીસીમાં જોડાય દેશ સેવાના સંસ્કાર સાથે ઉમરગામના ધિમસાકાકરીયાના યુવાને સતત પરિશ્રમ અને સંઘર્ષ કરી ભારતીય સેનામાં સ્થાન મેળવ્યું છે. નાસિક ખાતે યોજાયેલા સમારોહમાં યુવાનને ગૌરવ પદક એનાયત કરાયો હતો. આર્ટિલરી સેન્ટરમાં ટ્રેનિંગ પૂર્ણ કર્યા બાદ રાજસ્થાનના અલવર ખાતે ફરજ બજાવશે. 

વલસાડ જીલ્લાના છેવાડાના ઉમરગામ તાલુકાના સંજાણ નજીકમા ધીમસા કાંકરીયા ગામે હીરાલાલ ગુપ્તા પરિવાર સાથે રહેછે. તેમાં બે પુત્રો પૈકી 22 વર્ષીય પુત્ર રોહન ગુપ્તાએ એમકોમ પાર્ટ-1 સુધીનો અભ્યાસ કર્યો છે. જો કે અભ્યાસની સાથે તેણે એનસીસીમાં જોડાઈ દેશ સેવાના સંસ્કારો મેળવ્યા હતા. રોહને દેશસેવા કરવાના ધ્યેય અને લક્ષ્યાંક સાથે ભારે પરિશ્રમ સાથે સફળતા મેળવવા સફરની શરૂઆત કરી હતી. સતત મહેનતની સાથે આગળ વધી તેણે ભારતીય સેનામાં સ્થાન મેળવવા કોમ્પ્યૂટર અને સૌથી કપરી એવી ફિઝીકલ ટેસ્ટ સળતા પૂર્વક આપી સારા ગુણ મેળવ્યા હતા.

રોહને ભારતીય સેનાની બંને કસોટીમાં સફળતા મેળવતા આખરે તેની ભારતીય સેનામાં પસંદગી કરાઈ હતી. ભારતીય સેનામાં ફરજ બનાવતા પહેલા નાશિક ખાતે આર્ટિલરી સેન્ટર ખાતે 6 માસની તાલિમ મેળવવા ગયો હતો. ગઈકાલે શુક્રવારે આર્ટિલરી સેન્ટર ખાતે યોજાયેલા સમારોહમાં રોહન ગુપ્તાને ગૌરવ પદક એનાયત કરાયો હતો. આ દ્રશ્યને લઈ પરિવારજનો ભાવવિભોર બની ગયા હતા. ટ્રેનિંગ પૂર્ણ થયા બાદ આગામી સમયમાં રાજસ્થાનના અલવર ખાતે ફરજ પર હાજર થશે.

રોહન ગુપ્તાના પિતા હીરાલાલ ગુપ્તા સાથે ટેલિફનો પર થયેલી વાતચીત સાથે ભાવવિભોર બની પુત્રની સિધ્ધી બદલ ખુશી વ્યકત કરતા જણાવ્યું કે, રોહને પોતાના અભ્યાસની સાથે ભારતીય સેનામાં સ્થાન મેળવવા ઠંડી, તડોક કે વરસાદની પરવા કર્યા વિના સંજાણ ખાતે આવેલા મેદાનમાં કલાકોના કલાકો સુધી મહેનત કરતો હતો. તેની મહેનતને કારણે આજે દેશની સેવા કરવાનો તેનો મોકો મળ્યો છે એમ જણાવ્યું હતું.