રાવપુરાના કલ્પતરૂ ફ્લેટના અધૂરા બાંધકામથી બિલ્ડર સામે રહીશોમાં રોષ

Vadodara : વડોદરા શહેરના રાવપુરા વિસ્તારમાં આવેલા કલ્પતરૂ ફ્લેટના રહીશોએ બિલ્ડર દ્વારા અધૂરી કામગીરી છોડી મુકાતા ભારે નારાજગી વ્યક્ત કરી છે. કોઠી ચાર રસ્તાથી સલાટવાડા તરફના માર્ગ પર આવેલા આ ફ્લેટમાં વર્ષો જૂની સમસ્યાઓનો ઉકેલ ન આવતા રહેવાસીઓએ તંત્ર સમક્ષ કાર્યવાહી કરવાની માંગ ઉઠાવી છે.

સ્થાનિક રહેવાસી રાહુલ બારોટે જણાવ્યું હતું કે તેમણે વર્ષ 2017માં ફ્લેટ ખરીદ્યો હતો. તે સમયે બિલ્ડરે લિફ્ટની સુવિધા આપવાની બાંહેધરી આપી હતી, પરંતુ આજે 9 વર્ષ બાદ પણ લિફ્ટ કાર્યરત કરવામાં આવી નથી. વધુમાં ઇમારતના કેટલાક ભાગોમાં બાંધકામ અધૂરૂં છોડી દેવામાં આવ્યું હોવાનું જણાવાયું છે.

વધુમાં જણાવ્યા મુજબ ફ્લેટના બાંધકામમાં ત્રણ અલગ-અલગ સર્વે નંબર અને ત્રણ માલિકો સંકળાયેલા હોવાથી વારંવાર વિવાદો સર્જાઈ રહ્યા છે. લિફ્ટ માટે ફાળવેલી જગ્યા ખુલ્લી હોવાથી અકસ્માતનો ભય પણ ઉભો થયો છે.

આ ઉપરાંત ફ્લેટને અડીને ગેરકાયદેસર રીતે બીજી ઇમારત ઉભી કરવામાં આવી હોવાનો આક્ષેપ પણ કર્યો છે. બિલ્ડરને રજૂઆત કરવામાં આવે ત્યારે વિપુલ નામનો એક પોલીસ કર્મચારી આવીને ધમકાવે છે.

રહેવાસીઓએ કલ્પતરૂ ફ્લેટમાં તાત્કાલિક લિફ્ટની સુવિધા ઉપલબ્ધ કરાવવા, અધૂરૂં બાંધકામ પૂર્ણ કરાવવા તેમજ બાજુમાં ઊભી થયેલી ગેરકાયદે ઇમારતની તપાસ કરીને યોગ્ય કાર્યવાહી કરવાની માંગ કરાઇ છે.