સહકારી ક્ષેત્રમાં રાજકીય ભૂકંપ: બારડોલી સુગર મિલમાં 10 વર્ષ બાદ શાસન બદલાયું, ભાજપના સૂપડા સાફ!

Bardoli Sugar Mill Election Results : સુરત જિલ્લાના બારડોલી ખાતે આવેલી એશિયામાં સૌથી વધુ શેરડી પીલાણ ક્ષમતા ધરાવતી બારડોલી સુગર ફેક્ટરીની વ્યવસ્થાપક સમિતિની 15 બેઠકો માટે સામાન્ય ચૂંટણી યોજાઈ હતી. છેલ્લા 10 વર્ષથી સત્તા પર રહેલી ભાજપપ્રેરિત 'સહકાર પેનલ' નો આ ચૂંટણીમાં કારમો પરાજય થયો છે અને 'કિસાન પરિવર્તન પેનલ' નો ઝળહળતો વિજય થયો છે. સહકાર પેનલની 1 બેઠક બિનહરીફ થયા બાદ બાકીની બેઠકો માટે યોજાયેલા મતદાનમાં તેમના ઉમેદવારોનો 263 થી 564 મતોના મોટા અંતરથી પરાજય થયો હતો.

ધારાસભ્ય ઈશ્વર પરમાર અને ભાજપના પદાધિકારીઓ હાર્યા

શ્રી ખેડૂત સહકારી ખાંડ ઉદ્યોગ મંડળી લિ. (બારડોલી સુગર) ની ચૂંટણીમાં 10 વર્ષથી સત્તા સંભાળતા અને સહકાર પેનલના મોવડી સુરત જિલ્લા પંચાયતના માજી પ્રમુખ તેમજ સુરત જિલ્લા ભાજપ ઉપપ્રમુખ ભાવેશ પટેલ, સુરત જિલ્લા ખેડૂત સમાજના પ્રમુખ પરિમલ પટેલ અને માજી કેબિનેટ મંત્રી તથા બારડોલીના ભાજપ ધારાસભ્ય ઈશ્વર પરમાર સહિતના તમામ ડિરેક્ટરો ચૂંટણી મેદાનમાં ઉતર્યા હતા. જોકે, મુકેશ પટેલની નેતૃત્વ હેઠળની કિસાન પરિવર્તન પેનલે ભાજપ સમર્થિત તમામ દિગ્ગજ નેતાઓને પરાજય આપી મિલમાં સત્તાપરિવર્તન આણ્યું છે.

20 વર્ષથી વિદેશમાં રહેતા સભાસદે આવીને ઉમેદવારી કરી અને વિજેતા બન્યા

બારડોલી સુગર ફેક્ટરીમાં જ નોકરી કરીને 20 વર્ષથી વિદેશમાં સ્થાયી થયેલા ખેડૂત સભાસદ વિનોદચંદ્ર પટેલે અમેરિકાથી આવીને પરિવર્તન પેનલમાં બારડોલી બેઠક પરથી ઉમેદવારી નોંધાવી હતી. તેમણે સહકાર પેનલના ગિરીશ પટેલ સામે 403 મતોની મોટી સરસાઈથી વિજય મેળવ્યો હતો. આ ચૂંટણીમાં પણ દર વખતની જેમ વિદેશમાં સ્થાયી થયેલા ખેડૂત સભાસદોએ નિર્ણાયક ભૂમિકા ભજવી હતી.