અડાજણના સરદાર કોમ્પ્લેક્ષમાં એન્જલ સ્પા અને મોસ સ્પામાં પોલીસના દરોડા

- મસાજ પાર્લરની આડમાં કૂટણખાનું ચાલી રહ્યું હતુઃ બંને સ્પાના મેનેજર અને 8 મહિલા વિરૂધ્ધ કાર્યવાહી, મોસ સ્પામાંથી કોર્પોરેશનનું લાયસન્સ પણ મળ્યું

(પ્રતિનિધિ દ્વારા) સુરત, સોમવાર

અડાજણના ગુજરાત ગેસ સર્કલ સ્થિત સરદાર કોમ્પ્લેક્ષમાં ધમધમતા મસાજ પાર્લરની આડમાં ધમધમતા એન્જલ સ્પા અને મોસ સ્પા નામના કૂટણખાના પર દરોડા પાડી પોલીસે બંને સ્પાના મેનેજર અને આઠ મહિલાઓ વિરૂધ્ધ કાયદેસરની કાર્યવાહી હાથ ધરી છે.

રાંદેર પોલીસે બાતમીના આધારે અડાજણ ગુજરાત ગેસ સર્કલ સ્થિત સરદાર કોમ્પ્લેક્ષના પહેલા માળે દુકાન નં. 83માં એન્જલ સ્પામાં દરોડા પાડયા હતા. જયાંથી સ્પા મેનેજર આફ્રીદી વાજીદઅલી મોહમદ (ઉ.વ. 28 રહે. 203, એપલ ટાવર, મગબરા મસ્જિદની સામે, વેડ દરવાજા અને મૂળ. બટીકચ્છવા, તા. બરાડી, જિ. કઠીહાર, બિહાર) અને ત્રણ મહિલાઓને ઝડપી પાડી હતી. મેનેજરની પૂછપરછમાં સ્પા માલિક ગીતાબેન નામની મહિલા હોવાનું જણાવતા તેને વોન્ટેડ જાહેર કરી હતી. જયારે સ્પામાં મસાજની આડમાં ગ્રાહકોને શરીરસુખ માણવા માટે રૂ. 500 વસુલી મહિલાઓને રૂ. 250 આપતી હોવાની કબૂલાત કરી હતી. પોલીસે સ્પામાંથી રોકડ, ત્રણ મોબાઇલ અને કોન્ડોમ વિગેરે મળી કુલ રૂ. 27,300 નો મુદ્દામાલ કબ્જે લીધો હતો. પોલીસે સરદાર કોમ્પ્લેક્ષની દુકાન નં. 93 માં મોસા સ્પા નામના મસાજ પાર્લરમાં પણ દરોડો પાડયા હતા. જયાંથી મેનેજર વિશાલકુમાર શીવપ્રસાદ રોય (ઉ.વ. 29 રહે. 102, શ્રીરામ એપાર્ટમેન્ટ, અમરોલી કોલેજની સામે, અમરોલી) ની ધરપકડ કરી હતી. જયારે સ્પા માલિક ભુવનેશ્વરી શીબુદાસ અન તેની પાર્ટનર મોયના પ્રવિણ જાદવ ઉપરાંત દેહવિક્રયનો ધંધો કરતી પાંચ મહિલા વિરૂધ્ધ ગુનો નોંધી રોકડ અને મોબાઇલ મળી કુલ રૂ. 17 હજારનો મુદ્દામાલ કબ્જે લીધો હતો. ઉલ્લેખનીય છે કે પોલીસને મોસ સ્પા નામે સુરત મહાનગરપાલિકાનું લાયસન્સ અને ભાવ પત્રક પણ મળી આવ્યું હતું. પ્રાથમિક પૂછપરછમાં મસાજ માટે આવનાર ગ્રાહક પાસેથી રૂ. 1500 વસુલતા હોવાની મેનેજરે કબૂલાત કરી છે.