જામનગરમાં દિગ્જામ ઓવર બ્રિજ નીચે ઘોડીપાસાના જુગાર અંગે પોલીસના દરોડા સમયે ભારે નાસભાગ થતાં ફિલ્મી દ્રશ્યો સર્જાયા

Jamnagar Gambling Crime : જામનગરમાં દિગ્જામ ઓવરબ્રિજની નીચે ગઈકાલે સાંજના સમયે કેટલાક શખ્સો એકત્ર થઈને ઘોડીપાસાનો જુગાર રમી રહ્યા હોવાની બાતમીના આધારે પોલીસે દરોડો પાડતાં નાસભાગ થઈ હતી, અને ફિલ્મી દ્રશ્યો સર્જાયા હતા. પોલીસે પાંચ ખેલંદાઓને ઝડપી લીધા છે, જ્યારે પાંચ ભાગી છૂટયા હોવાથી તેઓને ફરાર જાહેર કરાયા છે.

જામનગરના સીટી સી. ડિવિઝનના પોલીસ સ્ટાફને ચોક્કસ બાતમી મળી હતી, કે ગઈકાલે સાંજે નવા આંબેડકર ઓવરબ્રિજની નીચે કેટલાક શખ્સો એકત્ર થઈને ઘોડીપાસા વડે જુગાર રમી રહ્યા છે, જે બાતમીના આધારે સીટી સી. ડિવિઝનના પોલીસ સ્ટાફે દરોડો પાડ્યો હતો. જે દરોડાને લઈને નાસભાગ થઈ હતી, અને જુગારીયા તત્વો અને પોલીસ વચ્ચે પકડદાવના ફિલ્મી દ્રશ્યો સર્જાયા હતા.

પોલીસે બનાવના સ્થળ આસપાસથી સિરાજ જુસબભાઈ નોયડા, મિલન અમરશીભાઈ શેખવા, જગતસિંગ રામસિંગ માલપાડા, મનોજ કાનાભાઈ કોળી, અને જગજીતસિંગ શેરસિંગ વગેરે પાંચ શખ્સોની અટકાયત કરી લઈ તેઓ પાસેથી રૂપિયા 31,300 ની રોકડ રકમ અને ઘોડીપાસાના જુગારનો સામાન કબજે કર્યો છે.

પોલીસના આ દરોડા સમયે અમર કોળી, વિક્રમ કોળી, કિશોર કોળી, કમલ કાનાભાઈ કોળી, અને રાજકુમાર કોળી નામના પાંચ શખ્સો ભાગી છૂટયા હોવાથી પોલીસે પાંચેયને ફરાર જાહેર કર્યા છે, અને તેઓની શોધખોળ હાથ ધરી છે.