વડોદરામાં હોટલ રોયલ પેલેસમાંથી પરપ્રાંતિય પિસ્તોલ અને કારતૂસ સાથે ઝબ્બે : રૂ.3 લાખનો મુદ્દામાલ કબજે

Vadodara Police : વડોદરા નજીકના વેમાલી ગામની એક હોટલમાં ચોથા માળના રૂમમાં રોકાયેલા મધ્યપ્રદેશના શખ્સ પાસેથી એક પિસ્તોલ, કારતૂસ, ખાલી બે મેગેઝીન અને હથિયારનું બનાવટી લાઇસન્સ મળી કુલ 3,06,800નો મુદ્દામાલ કબજે લઈ તેની અટકાયત કરી પૂછપરછ શરૂ કરી છે.

વડોદરા નજીકના વેમાલી ગામની સીમમાં આવેલી હોટલ રોયલ પેલેસના ચોથા માળે લોકલ ક્રાઈમ બ્રાન્ચે, મંજુસર પોલીસને સાથે રાખીને રેડ કરી હતી. રેડ દરમિયાન પોલીસને બનાવટી લાઇસન્સ મળી આવ્યું હતું. ઉપરાંત ત્રણ લાખની એક પિસ્તલ, 6,800ની કિંમતના 17 પિસ્તલના કારતૂશ, 4 ખાલી કારતૂસ, બે ખાલી મેગેઝીન મળી કુલ રૂ.3,06,800નો મુદ્દામાલ મળી આવતા પોલીસે તેને કબજે લીધો હતો. અને રૂમમાં રહેતા મધ્યપ્રદેશના ભીંડ જિલ્લાના લહાર તાલુકાના મોહનપુરા ગામના રવિ બિરેન શર્માની અટકાયત કરી હતી.