નારોલ પોલીસ ઊંઘતી રહી અને PCBએ રેડ મારી બે આરોપી સાથે લાખો રૂપિયાનો દારુ ઝડપ્યો

Ahmedabad News : અમદાવાદમાં સ્થાનિક પોલીસની નાક નીચે ચાલતા દારૂના વેપલાની પોલ ફરી એકવાર ખુલી ગઈ છે. નારોલ પોલીસ સ્ટેશન વિસ્તારમાં સ્થાનિક પોલીસ અંધારામાં રહી અને પીસીબીએ બાતમીના આધારે સપાટો બોલાવીને મોટા પાયે થતી દારૂની હેરાફેરીનો પર્દાફાશ કર્યો છે. નારોલ રંગોલી નગર તરફ જવાના રસ્તે ટોરેન્ટ પાવર પાસે રોડ પરથી પસાર થતા એક શંકાસ્પદ વાહનને આંતરીને પોલીસે ફર્નિચરની આડમાં છુપાવેલા વિદેશી દારૂ સહિત 38.44 લાખનો મુદ્દામાલ જપ્ત કર્યો છે. આ કાર્યવાહી દરમિયાન પોલીસે સ્થળ પરથી બે શખ્સોની ધરપકડ પણ કરી છે.

તૂટેલા ફર્નિચર અને ખોટી બિલ્ટીનો આશ્રય લીધો

બુટલેગરો દ્વારા પોલીસને ચકમો આપવા માટે એક નવો જ કીમિયો અપનાવવામાં આવ્યો હતો. આરોપીઓએ જૂના અને તૂટી ગયેલા ફર્નિચર જેવા કે ટેબલ, ખુરશી અને લાકડાની શેટીની એક ખોટી ટ્રાન્સપોર્ટ બિલ્ટી બનાવી હતી. આ ફર્નિચરની આડમાં જ હિમાચલ પ્રદેશના પાર્સિંગવાળા વાહનમાં વિદેશી દારૂ છુપાવીને અમદાવાદ લાવવામાં આવી રહ્યો હતો. PCBએ ચોક્કસ બાતમીના આધારે વોચ ગોઠવીને આ ગાડીને રોકી તલાશી લેતા અંદરથી ભારતીય બનાવટના વિદેશી દારૂની 177 પેટીઓ મળી આવી હતી. પોલીસે ગાડીમાં સવાર હિમાચલ પ્રદેશના સોલન જિલ્લાના રમેશચંદ રામલાલ ઝુલાહા અને અમદાવાદના અમરાઈવાડીમાં રહેતા જીતેન્દ્ર હરીરામ ચોરસીયા નામના બે આરોપીઓને રંગેહાથ ઝડપી લીધા હતા.

આ પણ વાંચો : ગુજરાતના 4 જિલ્લામાં વરસાદનું રેડ એલર્ટ, 3માં ઓરેન્જ એલર્ટ, 24 કલાકમાં 19 તાલુકા ભીંજાયા

5868 બોટલ દારૂ સહિત 38.44 લાખનો મુદ્દામાલ જપ્ત

PCB દ્વારા કરવામાં આવેલી આ મોટી કાર્યવાહીમાં વિદેશી દારૂની 5868 નાની-મોટી બોટલો, ટાટા ગાડી, બે મોબાઈલ ફોન, જૂનું ફર્નિચર અને ખોટી બિલ્ટી મળીને કુલ 38,44,944 નો માતબર મુદ્દામાલ જપ્ત કરવામાં આવ્યો છે. આ ગુનામાં સંડોવાયેલા અને હાલ પોલીસ પકડથી દૂર એવા અન્ય ચાર આરોપીઓ - હિમાચલ પ્રદેશના રણવીરસીંગ, ચંદીગઢના સુનીલ પુનીયા, ટાટા 710 ગાડીના માલિક અને ખાનભાઈ નામના શખ્સને વોન્ટેડ જાહેર કરવામાં આવ્યા છે. હાલ તમામ આરોપીઓ વિરુદ્ધ નારોલ પોલીસ સ્ટેશનમાં પ્રોહિબિશન એક્ટ હેઠળ ગુનો નોંધીને ફરાર અન્ય બુટલેગરોને પકડવા માટે કાયદેસરની તજવીજ હાથ ધરવામાં આવી છે.