પંચમહાલ જળબંબાકાર: હડફ અને પાનમ ડેમમાં પાણીની આવક વધતા તંત્ર એલર્ટ

Godhra News : પંચમહાલ જિલ્લામાં છેલ્લા પાંચ દિવસથી સતત વરસાદી માહોલ જામ્યો છે. જેના પગલે જિલ્લાની નાની-મોટી નદીઓ અને નાળામાં પાણીની આવક નોંધપાત્ર રીતે વધી છે. મોડી રાત્રે મોરવા હડફ તાલુકામાં ધમાકેદાર વરસાદ વરસ્યો હતો, જ્યાં એક ઇંચથી વધુ વરસાદ નોંધાયો છે. આ વરસાદને કારણે હડફ ડેમમાં પણ પાણીની આવક વધી છે, જેના પરિણામે ડેમનો એક ગેટ દોઢ ફૂટ સુધી ખોલીને 1830 ક્યુસેક પાણી છોડવામાં આવ્યું છે. હાલ હડફ ડેમમાં 1800 ક્યુસેક પાણીની આવક થઈ રહી છે અને ડેમની જળસપાટી 165.80 મીટરે પહોંચી છે. રૂલ લેવલ જાળવી રાખવા માટે આ પાણી છોડાયું છે.

બીજી તરફ, પંચમહાલ જિલ્લાની જીવાદોરી સમાન પાનમ ડેમમાં પણ સતત પાણીની આવક થઈ રહી છે. હાલ પાનમ ડેમમાં 6824 ક્યુસેક પાણીની આવક નોંધાઈ છે. જ્યારે ડેમમાંથી કેનાલમાં 150 ક્યુસેક પાણી છોડવામાં આવ્યું છે. પાનમ ડેમની જળસપાટી 126.70 મીટર પર પહોંચી છે, જે તેની ભયજનક સપાટી 127.41 મીટરની નજીક છે.

ડેમોમાંથી પાણી છોડવામાં આવતા તંત્ર દ્વારા નદી કિનારાના ગામોને સાવચેત રહેવા માટે એલર્ટ કરવામાં આવ્યા છે. સ્થાનિક પ્રશાસન દ્વારા પરિસ્થિતિ પર સતત નજર રાખવામાં આવી રહી છે અને લોકોને નદી કે નાળામાં ન જવા માટે સૂચના પણ આપવામાં આવી છે.