વડોદરા, તા.31 વડોદરાને અડીને આવેલા પાદરાનો વિકાસ પણ ખૂબ ઝડપથી થતો હોવાથી આ વિસ્તારમાં રહેણાંક ઝોન માટે વુડા દ્વારા બે ટીપી સ્કીમોની જાહેરાત કરવામાં આવી છે. આ ઉપરાંત આસોજ તેમજ મારેઠાની ચાર ટીપી સ્કીમોના ઇરાદા જાહેર કરી તેની માપણી કરાવવાનું નક્કી કરવામાં આવ્યું છે.
વડોદરા શહેરનો વિકાસ હવે છેક પાદરા સુધી પહોંચી ગયો છે અને પાદરામાં પણ મોટાપાયે બાંધકામો આકાર લઇ રહ્યા છે. આ તાલુકામાં ઉદ્યોગો અનેક હોવાથી પાદરા કેન્દ્રસ્થાન પણ બની રહ્યું છે. વુડા વિસ્તારમાં આવતા પાદરાના વિકાસ માટે પણ હવે વુડા દ્વારા કમર કસવામાં આવી છે. વુડાના બીજા ડેવલોપમેન્ટ પ્લાનમાં પાદરાના રહેણાંક ઝોનમાં આવતી જમીનોમાં ટીપી સ્કીમ માટે વુડા દ્વારા ગુજરાત નગર રચના અને શહેરી વિકાસ અધિનિયમ હેઠળ હદ પરામર્શ મેળવવાનું નક્કી કરાયું હતું.
દરમિયાન મુખ્ય નગર નિયોજક દ્વારા પાદરાની બે ટીપી સ્કીમોના હદ વિસ્તારને પરામર્શ આપવામાં આવ્યું હતું. પાદરાની ત્રીજા નંબરની ટીપી સ્કીમનો વિસ્તાર ૧૨૯.૦૭ હેક્ટર તેમજ પાદરાની ચોથા નંબરની ટીપી સ્કીમનો વિસ્તાર ૧૧૮ હેક્ટર છે. આ બંને ટીપી સ્કીમો બનાવવાનો ઇરાદો વુડા દ્વારા જાહેર કરવામાં આવ્યો છે. બાદમાં આગળની પ્રક્રિયા શરૃ કરવામાં આવી છે. ઇરાદો જાહેર કર્યા બાદ હવે વાંધા સૂચનો મંગાવવામાં આવશે અને બાદમાં અંતિમ ઇરાદો જાહેર કરાશે.
વુડા વિસ્તારમાં આવતી આસોજની ત્રણ ટીપી સ્કીમો તેમજ મારેઠાની એક ટીપી સ્કીમ વિસ્તારના હદ વિસ્તાર પણ નક્કી કરવાનો વુડા દ્વારા નિર્ણય લેવામાં આવ્યો છે. આસોજની ૫૮ નંબરની ટીપી સ્કીમનો વિસ્તાર ૧૧૭.૮૯ હેક્ટર, ૫૯ નંબરનો ૧૯૫.૮૬ હેક્ટર અને ૬૦ નંબરની ટીપી સ્કીમનો ૧૦૮.૭૧ હેક્ટર વિસ્તાર છે. જ્યારે મારેઠાની ૬૧ નંબરની ટીપી સ્કીમનો ૫૯.૭૭ હેક્ટર વિસ્તાર છે. આ ચારેય ટીપી સ્કીમોમાં હદ વિસ્તાર નક્કી કરી માપણી કરાવવામાં આવશે અને બાદમાં તેને મુખ્ય નગર નિયોજક ગાંધીનગર ખાતે મોકલાશે.
