વડોદરામાં ૨૬,૮૯,૧૧૭ મતદારો પૈકી ૫,૦૩,૯૧૨ મતદારો કમી થયા

 વડોદરા,ભારતના ચૂંટણી પંચ દ્વારા સમગ્ર રાજ્યમાં હાથ ધરાયેલ સ્પેશિયલ ઇન્ટેન્સિવ રિવિઝન (સર)અંતર્ગત વડોદરા જિલ્લામાં તારીખ ૨૮મી ઓક્ટોબરથી મતદાર યાદી સુધારણા સંબંધિત કાર્યવાહી શરૃ થઇ હતી. આજે મુસદ્દારૃપ મતદાર  યાદી પ્રસિદ્ધ કરવામાં આવી છે. હવે વાંધાઓની સુનાવણી શરૃ થશે.

મેપિંગ પ્રક્રિયા દરમિયાન સેન્ટ્રલાઇઝ્ડ ટીમની રચના કરીને કાર્ય કરવામાં આવ્યું હતું. ચૂંટણી પંચ, રાજ્ય સરકાર તથા મુખ્ય ચૂંટણી અધિકારીની કચેરી સાથે સતત સંપર્કમાં રહીને જરૃરી આયોજનનો અમલ કરવામાં આવ્યો હતો. આ કામગીરીમાં ૯ હજાર જેટલા કર્મચારી અને અધિકારીઓ જોડાયા હતા. આ  પ્રક્રિયાનો પ્રથમ તબક્કો પૂરો થતા પ્રસિદ્ધ કરાયેલી મુસદ્દા મતદાર યાદી  ચૂંટણી પંચની વેબસાઇટ, રાજ્યની અધિકૃત વેબસાઇટ તથા જાહેર સ્થળોએ પ્રસિદ્ધ કરવામાં આવશે. 

 શરૃઆતમાં વડોદરા જિલ્લામાં કુલ ૨૬,૮૯,૧૧૭ મતદારો નોંધાયેલા હતા, જેમાંથી ૨૧,૮૫,૨૦૫ મતદારોનું ડિજિટાઇઝેશન કરવામાં આવ્યું છે. ૫,૦૩,૯૧૨ મતદારો કમી થયા છે.  મોટા ભાગે  મતદારો દ્વારા  જાતે મેપિંગ પ્રક્રિયા પૂર્ણ કરવામાં આવી છે.  અનમેપ્ડ મતદારોના નામ મુસદ્દા મતદાર યાદીમાંથી કાઢી નાખવામાં આવ્યા નથી. તેઓ જરૃરી દસ્તાવેજો રજૂ કરીને પોતાનું નામ યથાવત રાખી શકશે.

આગામી તબક્કામાં ક્લેમ્સ અને ઓબ્જેક્શન્સની પ્રક્રિયા શરૃ કરવામાં આવી છે, જેમાં મતદારો ફોર્મ નં. ૬ અને ૮ મારફતે પોતાના દાવા અને વાંધાઓ રજૂ કરી શકશે.  આ  પ્રક્રિયા એક મહિના સુધી ચાલશે, જેના અંતે તમામ દાવા અને વાંધાઓની સુનાવણી બાદ અંતિમ મતદાર યાદી પ્રસિદ્ધ કરવામાં આવશે.