લગ્નના વરઘોડામાં મારક હથિયારો ઉછળ્યા ઃ મહિલા સહિત ૪ને ઇજા

વડોદરા, તા.14 વાઘોડિયા તાલુકાના રોપા ગામે લગ્નના સ્ટેજ પ્રોગ્રામમાં ધક્કો વાગવા બાબતે થયેલા ઝઘડાએ વરઘોડામાં ઉગ્ર સ્વરૃપ ધારણ કર્યુ હતું. બે પરિવારના સભ્યો વચ્ચે મારક હથિયારોથી હુમલો તેમજ મારામારીમાં ચાર વ્યક્તિને ઇજા થઇ હતી.

વાઘોડિયાની શિવકૃપા સોસાયટીમાં રહેતા મૂળ રોપા ગામના વતની અરુણાબેન અર્જુનસિંહ પરમારે કોટંબીમાં રહેતા ભારત કોયજી પરમાર, હરેશ ભારત પરમાર, કરણસિંહ શિવરાજસિંહ ચૌહાણ, ધનરાજ શિવરાજસિંહ ચૌહાણ અને વિષ્ણુ જાલમભાઇ ચૌહાણ સામે વાઘોડિયા પોલીસ સ્ટેશનમાં નોંધાવેલી ફરિયાદમાં જણાવ્યું છે કે અમારા કુંટુંબી સોહનનું લગ્ન હોવાથી અમે ત્યાં ગયા હતાં. 

રાત્રે સ્ટેજ પર લાઇવ પ્રોગ્રામ દરમિયાન કરણ અને ધનરાજે મારા પુત્ર હાર્દિકને ધક્કો મારતા ઝગડો થતાં બધાએ વચ્ચે પડી મામલો શાંત પાડયો હતો. બાદમાં મોડી રાત્રે વરઘોડો નીકળ્યો ત્યારેમેં મારા જેઠ ભારત પરમારને તમારા જમાઇ કરણસિંહ અને તેનો ભાઇ ધનરાજ મારા છોકરા સાથે ઝઘડો કરે છે તેને કશું કહો તેમ કહેતા તેઓ ઉશ્કેરાઇ ગયા હતાં અને ઝઘડો કરવા લાગ્યા હતાં. મને બે લાફા મારી ધક્કો મારી પાડી દીધી હતી. આ વખતે અન્ય લોકો પણ ભેગા થઇ ગયા હતાં.

સામા પક્ષે કરણસિંહ શિવરાજસિંહ ચૌહાણે હાર્દિક અર્જુન પરમાર, અર્જુન ફતેસિંહ પરમાર, વિનેક ફતેસિંહ પરમાર, અશ્વિન ભરત પરમાર, ભરત પ્રભાત પરમાર અને દિલીપ મગન પરમાર સામે નોંધાવેલી ફરિયાદમાં જણાવ્યું છે કે લગ્નમાં સ્ટેજ પર પ્રોગ્રામ ચાલતો હતો ત્યારે હાર્દિકે મારા નાના ભાઇ ધનરાજને ધક્કો મારતા બોલાચાલી થઇ  હતી. બાદમાં વરઘોડો રાત્રે નીકળ્યો ત્યારે અગાઉ થયેલા ઝઘડા અંગે ફરીથી બોલાચાલી થતાં તમામ આરોપીઓ લાકડીઓ લઇને તૂટી પડી માર મારતા મને તેમજ મારા ભાઇ ધનરાજ અને કાકા વિષ્ણુભાઇને ઇજા થઇ હતી.