અમદાવાદ: નરોડામાં રખડતા ઢોર પકડવા ગયેલી ટીમ પર હુમલો, અજાણ્યા શખસોની દાદાગીરી CCTVમાં કેદ

Ahmedabad News: અમદાવાદ શહેરમાં રખડતા ઢોરના ત્રાસને ડામવા માટે નીકળેલી મ્યુનિસિપલ કોર્પોરેશનની ટીમ પર હુમલાની વધુ એક ઘટના સામે આવી છે. શહેરના નરોડા વિસ્તારમાં ગાયો પકડવા ગયેલા CNCD (ઢોર ત્રાસ અંકુશ વિભાગ)ના કોન્ટ્રાક્ટ પરના કર્મચારીઓ પર પશુપાલકોએ જીવલેણ હુમલો કરતા ચકચાર મચી ગઈ છે.

પશુપાલકોએ સરકારી કામગીરીમાં અડચણ ઊભી કરી!

અમદાવાદ મ્યુનિસિપલ કોર્પોરેશનની CNCDની ટીમ નરોડા વિસ્તારમાં રખડતા ઢોર પકડવાની કામગીરી કરી રહી હતી. આ દરમિયાન જ્યારે ટીમ દ્વારા ઢોરને ડબ્બે પૂરવાની પ્રક્રિયા હાથ ધરવામાં આવી, ત્યારે ભરવાડ વાસમાં રહેતા કેટલાક શખસો ઉશ્કેરાઈ ગયા હતા. પશુપાલકોએ કાયદો હાથમાં લઈ સરકારી કામગીરીમાં અડચણ ઊભી કરી કર્મચારીઓ સાથે ઉગ્ર બોલાચાલી બાદ મારામારી કરી હતી.

આ પણ વાંચો: અમદાવાદ: સુભાષ બ્રિજ તોડવા માટે સાબરમતી નદી ખાલી કરાશે, 235 કરોડના ખર્ચે બનશે નવો બ્રિજ

હુમલાખોરો કર્મચારીઓને માર મારીને ભાગી રહ્યા હતા, ત્યારે આ સમગ્ર ઘટના નજીકના એક ફ્લેટના CCTV કેમેરામાં કેદ થઈ ગઈ હતી. ફૂટેજમાં સ્પષ્ટપણે જોઈ શકાય છે કે કઈ રીતે ઢોર માલિકો તંત્રની ટીમ પર હુમલો કરી રહ્યા છે. આ CCTV ફૂટેજ હવે પોલીસ તપાસમાં મુખ્ય પુરાવો બની શકે છે.

આ હિંસક હુમલા બાદ કોન્ટ્રાક્ટરના કર્મચારીએ હિંમત દાખવી કૃષ્ણનગર પોલીસ સ્ટેશનમાં ફરિયાદ નોંધાવી છે. પોલીસે ચાર શખસો સામે ગુનો દાખલ કરી તેમની શોધખોળ હાથ ધરી છે. તંત્ર દ્વારા સ્પષ્ટ કરવામાં આવ્યું છે કે ઢોર પકડવાની કામગીરી ચાલુ રહેશે અને અવરોધ ઉભો કરનારા તત્વો સામે કડક કાયદેસરની કાર્યવાહી કરવામાં આવશે.