મહુવામાં કાકા ઉપર હુમલામાં ભત્રીજીને છ માસ કેદની સજા

મારામારીના બે કેસમાં મહુવા અને ગઢડા કોર્ટનો ચુકાદો

સ્ટીરિયા પાસેથી દૂર રહેવા બાબતે થયેલી ધમાલમાં એક શખ્સને છ માસનો જેલવાસ

ભાવનગર: ભાવનગર અને બોટાદ જિલ્લામાં બનેલા મારામારીના બે બનાવમાં એક મહિલા તેમજ એક આધેડને અદાલતે કેદની સજા અને દંડનો હુકમ કર્યો છે.

પ્રથમ ચુકાદાની મળતી વિગત મુજબ મહુવામાં કરશનભાઈ પ્રેમજીભાઈ ભાલરિયા ગત તા.૨૩-૧૦-૨૦૧૪ના રોજ રાત્રિના સમયે તેમના મોટાભાઈ ભીમજીભાઈ ભાલરિયાને ટીફીન આપવા ગયા હતા. ત્યારે ભાઈ-ભાભી, ભત્રીજી-ભત્રીજા સહિતનાએ બોલાચાલી કરી ભત્રીજી નીતાબેન હરીભાઈ ભાલરિયા (રહે, બંદર રોડ, મહુવા)એ લોખંડના પતરાની ટયુબલાઈટની પટ્ટીથી માર મારી ઈજા પહોંચાડતા મહુવા પોલીસમાં ફરિયાદ નોંધાઈ હતી. આ અંગેનો કેસ મહુવાના એડી. ચીફ જ્યુડી. મેજિ.ની કોર્ટમાં ચાલી જતાં ન્યાયમૂર્તિ એચ.બી.શર્માએ નીતાબેન ભાલરિયાને તકસીરવાન ઠેરવી છ માસની સાદી કેદ અને રૂા.૩૦૦૦નો દંડ, દંડની રકમ ન ભરે તો વધુ બે માસની સાદી કેદ ભોગવવા હુકમ કર્યો હતો.

બીજા કેસમાં ગઢડાના નાના જીંજાવદર ગામે રહેતો હીરાભાઈ માવજીભાઈ ઝાલા (ઉ.વ.૪૬) નામના શખ્સને ગત તા.૩૧-૮-૨૦૧૮ના રોજ નાગ પંચમીના તહેવારમાં એક સગીરને સાઉન્ડ સિસ્ટમના સ્ટીરિયા પાસેથી દૂર ઉભવાનું કહ્યા બાબતે થયેલી મારામારીમાં ગઢડાના જ્યુડી. મેજિ. ફર્સ્ટ ક્લાસ એચ.એ.મકાએ કસુરવાન ઠેરવી છ માસની સાદી કેદ અને રૂા.૧૦૦૦નો દંડ, દંડની રકમ ન ભરે તો વધુ એક માસની સાદી કેદની સજાનો હુકમ કર્યો હતો.