મ્યુનિસિપલ કોર્પોરેશન એકશનમાં , શાહીબાગમાં ઢાબા વાળાએ ફૂડ વેસ્ટ કેચપીટમાં નાંખતા એકમ સીલ

  અમદાવાદ,સોમવાર,11 મે,2026

અમદાવાદના શાહીબાગ વોર્ડમાં એક ઢાબાવાળાએ મ્યુનિસિપલ કોર્પોરેશનની કેચપીટમાં ફૂડ વેસ્ટ નાંખતા સોલિડ વેસ્ટ વિભાગે તેનુ એકમ સીલ કર્યુ છે. મ્યુનિસિપલ કોર્પોરેશને શહેરના તમામ વિસ્તારમાં આવેલી કોર્પોરેશનની કેચપીટ કે ડ્રેનેજ લાઈનમાં કચરો નાંખનાર સામે કાર્યવાહી કરવાનો નિર્ણય કર્યો છે.

આ અંગે પ્રાપ્ત થતી વિગત મુજબ,મ્યુનિસિપલ કોર્પોરેશન તરફથી પ્રિ મોન્સૂન કામગીરી કરવામા આવી રહી છે.દરમિયાન સોમવારે સવારે ડેપ્યુટી મ્યુનિસિપલ કમિશનર રાઉન્ડમાં નીકળ્યા હતા. આ સમયે નમસ્તે સર્કલ પાસે આવેલા માધવ રાજસ્થાની ઢાબાવાળાએ કેચપીટમાં ફૂડ વેસ્ટ નાંખેલો જોવા મળ્યો હતો.કેચપીટમાં આ પ્રકારે ફૂડ વેસ્ટ નાંખવાથી વરસાદી પાણીના નિકાલમાં અવરોધ ઉભો થતો હોવાથી આ પ્રકારની કાર્યવાહી તંત્ર દ્વારા કરાઈ હતી.