યુનિ.ને રિસર્ચ પ્રોજેકટ માટે મળતા ફડિંગમાં બે વર્ષ બાદ વધારો થયો

વડોદરાઃ એમ.એસ.યુનિવર્સિટીને વિવિધ એજન્સીઓ તરફથી મળતા રિસર્ચ પ્રોજેકટ અને ફડિંગમાં  બે વર્ષ બાદ વધારો થયો છે.યુનિવર્સિટીના વિવિધ ફેકલ્ટીઓના અધ્યાપકોને ૨૦૨૪-૨૫માં ૬૭ રિસર્ચ પ્રોજેકટ માટે ૨૩ ફંડિંગ એજન્સીઓ તરફથી ૨૦.૬૪ કરોડ રુપિયા મળ્યા છે.

યુનિવર્સિટી સૂત્રોનું કહેવું છે કે,કોરોના બાદ અધ્યાપકો દ્વારા રિસર્ચ  પ્રોજેકટ માટે ફડિંગ એજન્સીઓ સમક્ષ મોકલવામાં આવતા પ્રસ્તાવ ઘટી ગયા હતા.જેના કારણે ૨૦૨૨-૨૩માં માત્ર ૨૧ રિસર્ચ પ્રોજેકટ માટે માત્ર પાંચ કરોડ અને ૨૦૨૩-૨૪માં માત્ર ૧૩ પ્રોજેકટ માટે ત્રણ કરોડ રુપિયા ફડિંગ મળ્યું હતું.

એક ફેકલ્ટી ડીને કહ્યું હતું કે, ફડિંગમાં ઘટાડો થવા પાછળ કાયમી અધ્યાપકોની ઓછી થયેલી સંખ્યા પણ જવાબદાર છે.કારણકે ફડિંગ એજન્સીઓ  કાયમી અધ્યાપકો દ્વારા રજૂ કરાતા રિસર્ચ પ્રોજેકટ જ મંજૂર કરતી હોય છે.જોકે ૨૦૨૪-૨૫માં યુનિવર્સિટી સત્તાધીશોએ આ બાબતની ગંભીર નોંધ લીધી હતી.જેના કારણે અધ્યાપકો દ્વારા મોકલવામાં આવેલા પ્રસ્તાવોમાં વધારો થતા ફડિંગમાં વધારો નોંધાયો છે.

યુનિવર્સિટીને કેન્દ્ર સરકાર તેમજ ગુજરાત સરકારના વિવિધ વિભાગો તથા યુનિસેફ દ્વારા પણ પ્રોજેકટ માટે ફંડ આપવામાં આવે છે.સૂત્રોનું કહેવું છે કે, અધ્યાપકોની કાયમી ભરતી બાદ  રિસર્ચ પ્રોજેકટની સંખ્યાની સાથે ફડિંગમાં વધારો થઈ શકે છે.ઓછા રિસર્ચ પ્રોજેકટ અને ઓછુ ફડિંગ યુનિવર્સિટીના નેક અને એનઆઈઆરએફ રેન્કિંગ  પર ગંભીર અસર પાડી શકે છે

કેટલા પ્રોજેકટ માટે કેટલી સહાય મળી 

વર્ષ પ્રોજેકટ રકમ

૧૯-૨૦ ૨૭ ૫.૩૧ 

૨૦-૨૧ ૨૫ ૧૧.૪૫

૨૧-૨૨ ૪૨ ૨૫.૦૩

૨૨-૨૩ ૨૧ ૫.૦૩

૨૩-૨૪ ૧૩ ૩.૦૧

૨૪-૨૫ ૬૭ ૨૦.૬૪